Khu kăn lăm tŏng kum mâu ngế xía vâ dêi mâu lêng Việt Nam  pơxiâm vâ vêh dêi tơnêi têa, hiăng klêi pêi hnoăng cheăng veăng kơjo kum tơkâ luâ xơpá xua tơnêi tơhnâp a Thổ Nhĩ Kỳ. Leh chiân mâu lêng Việt Nam vêh dêi tơnêi têa châ tơkŭm po a tơraih tơ ƀai Hatay a Antakya, pơlê xiâm dêi kong pơlê Hatay, Thổ Nhĩ Kỳ.

Tơbleăng a rôh leh, Kăn teăng mâ Đỗ Sơn Hải tối nhên, tơdroăng cheăng Mâu lêng Việt Nam djâ mâu lêng lăm veăng tŏng kum, tŏng xo mâu ngế trâm xía vâ a Thổ Nhĩ Kỳ tung mâu hâi hdrối kố nah cho vâ veăng ‘no hnoăng mơdêk tơrŭm krá pơla péa tơnêi têa. Péa Khu lêng Việt Nam ƀă Khu xiâm Kŏng an Việt Nam hiăng mơ-eăm tơkâ luâ hên tơdroăng pá, ôh tá xâu rơ-iô, mơ-eăm kum kuăn pơlê Thổ Nhĩ Kỳ tơkâ luâ tơdroăng pá xua tơnêi tơdro, châ kuăn pơlê, mâu kăn kong pơlê ƀă mâu lêng tŏng kum xía vâ dêi lâp plâi tơnêi ki ê loi nhoăm, khĕn kơdeăn.

Tung pơla tơbleăng pêi tơdroăng tŏng kum sap hâi lơ 13 troh lơ 22/2 lăm troh a kong pơlê Hatay, khu lêng Việt Nam hiăng tơkŭm tí tăng a 31 tíu, châ hlo 15 tíu ai ngế tung tíu tơnêi tơhnâp, tung mê ai 2 tíu ki ối ai ngế rêh. Klêi mê, khu kố hiăng pơcháu ăm tíu pêi cheăng tŏng xo mâu ngế xía vâ dêi kong pơlê kong têa mê xúa tơmeăm ki hngăm chiâ pong tơnêi, tíu tơhnâp vâ châ xo 28 châ mâu ngế ki hlâ lo pá gong. Kơxê lơ 23/2, khu kố hiăng vêh troh a Nội Bài, Hà Nội.