Hâi lơ 2/12, a tíu pêi cheăng Xiâm Đảng, pôa Nguyễn Phú Trọng, Kăn xiâm pơkuâ hnê ngăn Đảng hôp Khu xiâm Kal kí ăm veăng hnê tối ‘na tơdroăng tơkêa mơgêi 10 hơnăm pêi pro tiô pơkâ dêi khu xiâm kal kí ‘na troăng rơhlâ, tơdroăng cheăng mơnhông Pơlê kong kân Hồ Chí Minh troh hơnăm 2020; troăng vâ pêi, tơdroăng cheăng pêi mơnhông troh hơnăm 2030 hvái ngăn mâu tơdroăng vâ pêi troh hơnăm 2045.  A rôh hôp mê, Khu xiâm kal kí môi tuăn pơkâ ‘na troăng rơhlâ, tơdroăng cheăng mơnhông pơlê kong kân Hồ Chí Minh ƀă pơkâ troh hơnăm 2030 cho pơlê kong kân cheăng mơdró kâ - kơmăi kơmok tiô túa nếo nôkố, djâ troăng a hdrối ‘na cheăng kâ kơxô̆, cheăm khu kơxô̆, cho tíu xiâm cheăng kâ, ‘na liăn ngân, tê mơdró kâ, khoa hok kơmăi kơmok, túa lĕm tro dêi kơpong  Đông Nam Á, tơrŭm tơrôa ƀă lâp plâi tơnêi trâu rơdâ.

Troh hơnăm 2045, chiâng tíu xiâm cheăng kâ, liăn ngân, mơdró kâ châu Á, cho tíu ki lĕm tơ’mot hên ngế tung lâp plâi tơnêi troh, cheăng kâ, túa lĕm tro mơdêk ki tơƀrê krê xêh, tơdroăng rêh ối tơƀrê hên tâ nếo; cho kơphô̆ mơnhông mơdêk tơdâng tơ‘mô ƀăng mâu kơphô̆ ki kân dêi lâp plâi tơnêi. Khu xiâm kal kí pơkâ thế pơlê kong kân pơtối rak vế pêi pro tơdroăng ki lĕm dêi kăch măng tơrŭm môi tuăn, tơrŭm krá ƀă mâu kơ koan ƀă mâu kong pơlê pêi tơ ƀrê Pơkâ.

Mơnhông cheăng kâ tơtêk rĕng, krá ton, mơdêk ki tơƀrê tơmeăm pêi lo, tơmeăm pê lĕm krá, pơxúa ƀă châ tơbriêt tê ƀă lâp plâi tơnêi; mơdêk tơrŭm mơnhông mơdêk kơpong mơdêk mơjiâng tơmeăm khoăng tơdâng tơ’mô, tơniăn tơmeăm khoăng pêi pro hdrối môi hvêa.