Khu xiâm ngăn kơmăi kơmok ƀă tê mơdró pêi cheăng ƀă kăn pơkuâ kong pơlê Kon Tum
Thứ năm, 14:44, 08/08/2024
Tơplôu: Katarina Nga/VOV Tây Nguyên
Tơplôu: Katarina Nga/VOV Tây Nguyên
VOV4.Xơ Đăng - Kơxê lơ 7/8, Khu ki pêi dêi hnoăng cheăng dêi Khu xiâm ngăn kơmăi kơmok ƀă tê mơdró xua pôa Nguyễn Hồng Diên, Ngế xiâm ngăn ngăn kơmăi kơmok ƀă tê mơdró pro ngế pro xiâm pơkuâ djâ khu kố hiăng pêi cheăng ƀă kăn pơkuâ kong pơlê Kon Tum ‘na tơdroăng mơjiâng pro kế tơmeăm ƀă kơmăi kơmok ƀă tơdroăng cheăng tê mơdró; tơdroăng tơbleăng pêi pro túa pơkâ kơvâ cheăng Tơnêi têa tung kơvâ on tơhrik – kế tơmeăm tung kơdâm tơnêi.
Tơpui a rôh pêi cheăng, pôa Nguyễn Hồng Diên tối tiah kố, pakĭng mâu tơdroăng ki pêi pro klêi, kong pơlê Kon Tum ối hên pá puât chiâng tơdjâk troh mâu tơdroăng ki tá hâi pêi pro klêi tung pơla pêi pro mâu tơdroăng tơkêa, hnoăng cheăng.
‘Na hnoăng cheăng tung la ngiâ, pôa Nguyễn Hồng Diên pơkâ thế kong pơlê Kon Tum tơbleăng pêi pro tơƀrê mâu troăng hơlâ pơkâ dêi Đảng, Tơnêi têa ‘na mơnhông cheăng kâ rêh ối tung hơnăm 2024 ƀă mâu hơnăm ki pơtối, malối cho mâu troăng hơlâ nếo ai xêt khât ing hâi lơ 1/8, mê cho Luât tơnêi tơníu, Luât hngêi ối, Luât tê mơdró hngêi trăng tơnêi tíu ƀă hên ki ê, malối cho troăng hơlâ tê on tơhrik tơdrêng, troăng mơhnhôk mơjiâng on tơhrik kơtâu ƀă tôu mâ hâi krâ a kuâ hngêi.
Viết bình luận