Tơmiât troh tơbâ 75 hơnăm Hâi Pôa Hồ Chí Minh mơ’no 6 tơdroăng Pôa Hồ hnê Kŏng an kuăn pơlê, kơxê lơ 6/3, a Hà Nội, Khu xiâm ngăn Kŏng an tơkŭm po leh mơgêi rôh tơ’noăng ƀă mơđah tơbleăng rôh tơ’noăng kơchuâ um hnê tối “Mơjiâng túa rêh ối ngế kŏng an kuăn pơlê khên tơnôu, rơkê xua kuăn pơlê kum kuăn pơlê”. Klêi kơ’nâi 3 khế tơbleăng, Khu tơkŭm po hiăng châ xo lối 1 rơpâu kơtâ um pơtroh tơ’noăng dêi 500 ngế ki kơchuâ. Mâu um ki pơtroh tơ’noăng kố mơhno tơdroăng ki kal: Mơnhông khôi túa ton nah khên tơnôu, Kŏng an kuăn pơlê djâ troăng ahdrối, djâ troăng mơjiâng Đảng, mơjiâng khu lêng krúa lĕm, krá rơdêi, pêi pro 6 tơdroăng Pôa Hồ hnê tơkâ luâ 75 hơnăm.

Ô eăng tơdroăng ki hlâ rêh ƀă mâu ivá hnoăng cheăng pleăng dêi mâu rơxông kăn ƀô̆, lêng tung tơdroăng rak vế ƀă gâk kring tơnêi têa ƀă tơniăn tung pơlê pơla. Tung mê, hên um kơchuâ ‘na ngế Kŏng an chính quy lăm troh a cheăm pơlê, veăng kum rak vế tơniăn gâk kring, mơdêk hiâm mơno xua tơnêi piu dêi tơná, xua vâ kum kuăn pơlê. Mơgêi rôh tơ’noăng, Hô̆i đong châ̆m tơ’noăng hiăng rah xo châ 5 pri A, 10 pri B, 15 pri C ƀă 20 pri mơhnhôk.