Hâi lơ 21/2, Ƀơrô cheăng rak ngăn troăng prôk III.4 (Khu xiâm ngăn troăng prôk ƀă rơxế kơtâu) ai hlá mơ-éa pơtroh ăm Khu rak ngăn tơdroăng tơkêa 2 – cho ngế ki ‘no liăn bro tơdroăng tơkêa Mơdêk tơdjêp ăm prôk kơpong Tây Nguyên, hnê mơhno mâu khu ki bro athế rak tơniăn troăng prôk drêng pro tơdroăng tơkêa 2 kong pơlê Gia Lai prế Bình Định. Ki nhên, Ƀơrô cheăng rak ngăn troăng prôk III.4 – Kơpong rak ngăn troăng prôk III, pơkâ thế Khu rak ngăn tơdroăng tơkêa 2 (Ngế ki ‘no liăn) hnê mơhno mâu khu ki bro a troăng kân 19 séa ngăn, ‘mêng rơnêu mâu tíu ki tơ’nhiê, tíu ki kơhlong kơhlăng, a mâu tíu ki bro ôh tá ai kế ki tơbleăng bro ôh tá tơniăn a troăng prôk.

Tung pơla ‘mâi rơnêu hdrối hâi 28/02/2023 ƀă ai hlá mơ-éa, um tối tơbleăng tơdroăng pêi pro. Tơdroăng tơkêa Mơdêk tơdjêp troăng prôk kơpong Tây Nguyên châ pơxiâm tơbleăng khế 9/2021, ƀă tâi tâng ki xŏn 143km, tơkâ luâ 2 kong pơlê Gia Lai (126km) ƀă Bình Định (126km), ai tâi tâng kơlo liăn ‘no dâng 3.600 rơtal liăn. Hâi khế klêi tiô tối hdrối cho khế 12/2023.