Kơxo lơ 20/2, a Khu xiâm pơkuâ ngăn lêng, Khu xiâm ngăn tơdroăng kal kí Khu lêng Việt Nam tơrŭm ƀă Hô̆i đong lĭ luâ̆n Tơnêi têa, Khu ki chêh mơ’no hlá mơ-éa kal kí Tơnêi têa Ki khât tơkŭm po Rôh hôp khoa hok Séa ngăn kơtăng hiâm mơno hnê mơhno tung kơxop hlá mơeăm "Khŏm mơ-eăm, tơplâ hbrâ mơdât kâ kơluâ, veăng kum mơjiâng Đảng ƀă Tơnêi têa pin rế hía rế krúa, rơdêi” dêi pôa Nguyễn Phú Trọng, kăn xiâm pơkuâ hnê ngăn Đảng tung pêi pro ƀlêi chiâng hnoăng cheăng lêng, gak kring, rak vế Tơnêi têa nôkố.

Đăi tươ̆ng Phan Văn Giang, Ngế cheăng tung Khu xiâm pơkuâ tơdroăng kal kí, kăn phŏ pơkuâ hnê ngăn Đảng lêng Tơnêi têa, Ngế xiâm pơkuâ ngăn lêng veăng hôp. Rôh hôp tơkŭm po ‘no tơdrêng ing um tơvi ƀă ‘no tơdrêng ing troăng hyôh internet a 41 to tíu ki mơ’no tung tâi tâng khu lêng ƀă 1.600 ngế kăn veăng. A rôh hôp, mâu kăn hiăng tơkŭm pêi pro nhên ki pơxúa lĭ luâ̆n, ki ai khât dêi kơxop hlá mơ-éa, mâu tơdroăng ki kal ‘nâi sap ing tơdroăng ki ai khât tung rôh tơplâ mơdât kâ kơluâ, ƀă hnoăng cheăng mơjiâng ƀă rak vế Tơnêi têa Việt Nam xah hô̆i chuh ngiah nôkố ƀă mơjiâng khu lêng kăch măng, chính quy, rơkê ƀĕng ƀeăn ƀă rơkê tiô chal nôkố.