Kơxo lơ 24/2, Khu xiâm pơkuâ ngăn lêng tơkŭm po Leh khĕn kơdeăn khu lêng kuăn pơlê Việt Nam pêi klêi hnoăng cheăng tŏng kum, ‘mâi mơnhông mâu kế tơmeăm klêi kơ’nâi tơnêi tơdro a Thổ Nhĩ Kỳ pơla hdrối kố nah. Khu lêng dêi kuăn pơlê Việt Nam lăm ngi kong têa Thổ Nhĩ Kỳ veăng tŏng kum, ‘mâi mơnhông kế tơmeăm klêi kơ’nâi tơnêi tơdro tung mê ai 76 ngế lêng.

Sap ing hâi lơ 13/2 troh lơ 22/2, khu lêng kuăn pơlê Việt Nam ai 76 ngế sih quan, khu lêng ki rơkê hiăng veăng tŏng kum ƀă tŏng xo kuăn mơngế ki tro tơnêi, kế tơmeăm tâp kơđu xua tơnêi tơdro a Thổ Nhĩ Kỳ, tung tơdroăng ki kong prâi hngíu ó, khu kố hiăng tơbleăng tí tăng 31 tíu, châ hlo 15 tíu ki ai kuăn mơngế tung mâu hngêi ki tơhnâp, tung mê, ai 2 tíu ki ai mâu ngế ki tro kreăng chiâng vâ tŏng xo vâi lo pa gong.

Khu kố hiăng diâp dâng 25 tâ̆n kế tơmeăm, kế kâ, kum ăm kuăn pơlê kơpong ki ai tơnêi tơdro. A rôh leh, Kăn xiâm pơkuâ ngăn lêng hiăng pơkâ thế diâp ƀâng khĕn kơdeăn dêi Ngế pro xiâm hnê ngăn Chin phuh ăm 4 khu pú hên ƀă 7 ngế krê. A leh khĕn kơdeăn, tai tâng 76 ngế lêng kố hiăng châ diâp ƀâng khĕn kơdeăn dêi Kăn xiâm pơkuâ ngăn lêng xua hiăng kơhnâ rơkê tung pêi pro hnoăng cheăng.