Klêi kơ’nâi tơmâng teăng mâ kăn pơkuâ ngăn Đảng pơlê kong kân pơchuât hlá mơ-éa pơtroh pâ rơkong tơpui hnê mơhno ‘na túa pơkâ, ăm rơkong tơpui mâu kơ koan veăng tơpui ‘na tơdroăng pơkâ, Khu xiâm pơkuâ tơdroăng kal kí hiăng tơkŭm tơpui ƀă hiăng môi tuăn ‘na mâu troăng hơlâ, túa tơmiât kân, ki kal troăng tơmiât túa pơkâ Pơlê kong kân Hồ Chí Minh.

Mơgêi Rôh hôp, pôa Tô Lâm, Kăn xiâm pơkuâ hnê ngăn Đảng, kăn xiâm hnê ngăn tơnêi têa pơchân, tối nhên mâu tơdroăng ki kal. Túa pơkâ athế pêi pro hơ’lêh mâu troăng pơkâ dêi Đảng, mâu pơkâ dêi Khu pơkuâ ngăn xiâm Đảng, Khu xiâm pơkuâ tơdroăng kal kí, Khu pơkuâ ngăn Đảng pơkâ tung pơla hdrối nah.

Túa pơkâ athế mơhno nhên hnoăng cheăng, tíu cheăng ki kal dêi Pơlê kong kân Hồ Chí Minh, cho tíu xiâm cheăng kâ, túa lĕm tro, hnê hriâm, hnê cheăng pêi, khoa hok - kong ngê̆ dêi tơnêi têa. Khu xiâm pơkuâ tơdroăng kal kí pơkâ thế Khu pơkuâ hnê ngăn Đảng Pơlê kong kân Hồ Chí Minh tơkŭm pơkuâ rĕng pêi pro klêi Túa pơkâ.