Vêh mơnhên tơdroăng ki hnê tối dêi pôa Hồ Chí Minh, rơtế ƀă tâi tâng kuăn pơlê tung lâp tơnêi têa, vâi krâ-nhŏng mâu hdroâng kuăn ngo Tây Nguyên hiăng đi đo tơrŭm krá khât dêi pó, kơhnâ mơ-eăm tung pêi cheăng, mơjiâng pơlê cheăm rế hía rế kro mơdrŏng kân, ăm tơdroăng rêh ối phâi tơtô, hơniâp lĕm.

Tíu ối kơpong tơkăng kong dêi cheăm Đăk Nhoong, tơring Đăk Glei, kong pơlê Kon Tum, pôa A Cu, hdroâng Jêh - Triêng, Kăn pơkuâ hnê ngăn chi ƀô̆ xuân cho kăn thôn Đăk Ga ai tối, vâi krâ-nhŏng o đi đo tŏng gum dêi pó vâ mơnhông pêi cheăng kâ ƀă kơhnâ khât tung tơdroăng veăng gum kring vế, gak ngăn tơniăn tói tơkăng kong. Tơdroăng ki hriâm ƀă pêi pro tiô hnoăng cheăng dêi Pôa Hồ ga cho achê, hlê plĕng, tơtro ƀă mâu đảng viên a tíu kố:

“Rêm hâi á hriâm tâp ƀă pêi pro tiô troăng hơlâ, hiâm mơno dêi Pôa cho hriâm mâu tơdroăng ki lĕm tro. Hriâm Pôa ‘nâi kơdĭng, ôh tá mơhrê liăn ngân hmanag to lo vâ, ôh tá ‘no hrê kế tơmeăm ‘nhiu ‘nháu. Klêi mê, hriâm tơdroăng ki tơpui kâ, rêh ối, mơhnhôk hnê vâi krâ-nhŏng o pêi cheăng kâ vâ mơnhông pêi cheăng kâ, gum ăm dêi rơpŏng mơnhông pêi cheăng kâ, pro kro mơdrŏng ƀă hluăn ing kơtiê tơniăn ton”.

Đảng viên djâ troăng ahdrối ƀă djâ troăng pêi pro ahdrối vâ vâi krâ-nhŏng o pêi pro tiô, mê cho tơdroăng ki pôa A Thiếu, hdroâng Jarai, ối a pơlê Lung, cheăm Ya Xiêr, tơring Sa Thầy, kong pơlê Kon Tum rak vế, pêi pro ‘mâi rơnêu  dêi kơdrum deăng, mơnhông pêi cheăng kâ tung rơpŏng hngêi:

“Tâng pin pêt hdrê loăng hmếo pơ lôi tiah mê hdrê loăng kô ôh tá xông dâi lĕm, ah vâi tối mơnĕn tơnêi têa hbru ăm hdrê ki ôh ta dâi, tiah mê, cho ôh tá tro, tơdroăng ki mê cho xúa ing tơná pin ôh tá vâ kơhnâ rak ngăn dêi hdrê  loăng. Tâng pin rak ngăn tôh têa, rơvât phon krâu khât ga kô chiâng dâi lĕm. Rơpŏng ki lâi chiâ klôh pêt loăng, ‘no liăn rôe kơmăi tôh têa ƀă pong têa klôh, pơkrâ troăng kơxái, troăng meăm tôh têa ăm hdrê loăng. Rơpŏng á hiăng kơhnâ mơ-eăm pêt loăng ăm chiâng dâi lĕm vâ tơngah kô châ pêi lo liăn ngân, mơnhông iâ ‘na tơdroăng rêh kâ ối, ƀă ăm kuăn pơlê rơtế châ hriâm pêi ƀôí vâ hluăn ing kơtiê xahpá”.

3 hơnăm hdrối mê hía nah, mâu pơlê cheăm dêi hdroâng kuăn ngo a kong pơlê Kon Tum hiăng pêi pro châ lối 800 túa cheăng, gum dêi pó mơnhông pêi cheăng kâ, ‘mâi rơnêi mâu kơdrum deăng, tah lôi khôi túa, vêa vong ki ôh pa tro ƀă hên hĕng mâu tơdroăng ki ê. Mâu túa cheăng ki kố hiăng gum ăm lối 10.000 rơpŏng kơtiê ƀă vâ chê kơtiê ai troăng hơlâ ki vâ mơnhông tơdroăng rêh kâ ối. Cho môi ngế ki rơkê, hiăng châ kâ pro mơhá a Roh Hôp ‘na thăm mơdêk hriâm tâp ƀă pêi pro tiô hiâm mơno, túa rêh, túa cheăng Hồ Chí Minh xua Khu kăn pơkuâ hnê ngăn Đảng kong pơlê Kon Tum po a khế 5 pơla hdrối kố nah, pôa A Huế, hdroâng Rơteăng, Kăn thôn Kon Nhên, cheăm Đăk Ruồng, tơring Kon Braih tối ăm ‘nâi:

“Hriâm tâp ƀă pêi pro tiô troăng hơlâ, tuăn mơno, túa rêh, túa cheăng Hồ Chí Minh, ngin hiăng mơhnhôk vâi krâ-nhŏng o mơjiâng tơtro khât ‘na thôn pơlê nếo. Á cho ngế ki pơtối mơnhôk vâi krâ-nhŏng o tŏng gum pêi drôm, tơveăng dêi pó, ‘mâi rơnêu, po văng kơdrum tâ tá kuât, ‘mâi bro troăng prôk. Pêt hdrê loăng a péa pâ kĭng troăng ƀă mâu troăng ki mot tung thôn pơlê. Ngăn tơdroăng ki ai păng ‘nâng vâ mơnhông mê nôkố kuăn pơlê ôh tá xê ai tơdroăng rêh ối pá puât tiah hdrối mê hía nah xếo”.

Xuân môi tiah a kong pơlê Kon Tum, vâi krâ-nhŏng o mâu hdroâng kuăn ngo a kong pơlê Lâm Đồng dế pơhlêh mâu hdrê pêt, xúa ki rơkê plĕng dêi khoa hok kih thuât ‘mot tung pêi chiâk pêi deăng vâ pêi lo hên kế tơmeăm, tơdroăng rêh kâ ối rế hiá rế châ mơnhông. Pôa Kon Sơ Ha Vương, hdroâng K’Ho, Kăn hnê ngăn Vi ƀan Măt trâ̆n tơnêi têa cheăm Dà Nhim, tơring Lạc Dương tối ăm ‘nâi, nôkố vâi krâ-nhŏng o ôh tá xê pêt to môi hdrê loăng kơphế, mê hiăng rơkê plĕng tung tơdroăng pêt mơjiâng hên hdrê loăng ki ê, chôa ‘lâng mơnhông pêi pêt tơmeăm ki vâ tê mơ’no a kơchơ, ƀă veăng tơdjuôm ivá mơno mơjiâng cheăm rêh ối, pêi cheăng tiô túa nếo.

“Ƀă hnoăng cheăng tơnêi têa rơtế ƀă kuăn pơlê veăng pêi pro, hên mâu troăng prôk, kông, klôh pơrá châ mơjiâng pro krá kâk. Tơdrêng ƀă tơdroăng pêi lo kế tơmeăm tơniăn, tơdroăng rêh kâ ối, ‘na tuăn mơno dêi kuăn pơlê hiăng châ mơnhông mơdêk hên tâ hdrối nah”.

Xuân rơkê tung tơdroăng tí tăng rôe pêt hên mâu hdrê loăng vâ khoh châ ai tơmeăm mơ’no tê tiô kuăn pơlê rơhêng vâ rôe, mơngế Rơđế a kong pơlê Dak Lak dế kơdo mơ-eăm pêi cheăng kâ vâ pro kro mơdrŏng. Pôa Y Mi Êban, ối a ƀuôn Ea Kmat, cheăm Hoà Đông, tơring Krông Pač ai tối ‘na tơdroăng pêt tơvât ƀă hdrê loăng plâi sầu riêng, kơxái tiu tung kơdrum kơphế ai 1 ha 4 sao.

“Á cho ngế đảng viên mê mâu tơdroăng cheăng á athế pêi pro ahdrối vâ vâi krâ-nhŏng o ki ê hriâm pêi pro ƀối, đi đo kơhnâ khât tung tí tăng hriâm mơnhông pêi cheăng kâ ăm dêi rơpŏng hngêi. Drêng pêt tơvât mâu hdrê ki ê tung kơdrum plâi sầu riêng, xua ôh tá ai liăn hên mê á kơdo mơ-eăm lăm tí tăng mung xêh liăn a hngêi rak liăn, hriâm ‘na kih thuât ki pêt. Hơnăm kố á châ krí xo dêi 15 tâ̆n plâi sầu riêng, tơdrêng amê, hnối châ tê dêi pơ’leăng kơphế, tiu, tơdroăng rêh kâ ối xuân hiăng chía tơniăn”.

A kong pơlê Gia Lai, vâi krâ-nhŏng o mâu hdroâng kuăn ngo xuân dế hriâm mâu túa pêi cheăng ki nếo ăm tơdroăng rêh kâ ối rế hiá rế phâi tơtô. Pôa Hmrick, hdroâng Jarai, ối a pơlê Ia Nueng, cheăm Biển Hồ, Pơlê kong kân Plei Ku tối ăm’nâi, kơnôm ai tơdroăng tŏng gum dêi tơnêi têa, vâi krâ dế vêh mơnhông dêi mâu túa cheăng tiô chal vâi krâ roh nah, môi tiah bleăng pro um loăng, tĕn pong, kơtum kơtŏn, pơchên mâu kơchâi kâ ki kơhiâm, krúa hnối pêi adrêng ƀă tơdroăng ki vâ tơ’mot tơmối ôm hyô, tê mơdró châ lo liăn ngân.

“Dế nôkố, tơdroăng rêh kâ ối dêi vâi krâ-nhŏng o hiăng châ mơnhông, tung pơlê hiăng ai troăng prôk tơniăn, ôh tá ai rơpŏng ki kơtiê xếo. Cho ngế krâ pơlê, á đi đo hnê tối hnrê tối ăm vâi krâ-nhŏng o tung pơlê hlê nhên ‘na troăng pơkâ, troăng tơdjâ dêi Đảng, Tơnêi têa vâ vâi krâ-nhŏng o loi tơngah khât troăng pơkâ dêi Đảng, Tơnêi têa. Mơjiâng pơlê túa lĕm tro ôm hyô pơlê pơla cho troăng prôk ki tro ‘ló khât vâ pơhlêh tơdroăng rêh kâ ối dêi kuăn pơlê kô châ phâi tơtô, hơniâp ro hên tâ”.

Tơdrêng ƀă vâi krâ-nhŏng o hdroâng kuăn ngo a Tây Nguyên, mơngế M’Nông a kong pơlê Dak Nông dế tơdjuôm môi hiâm mơno tơ’noăng mơnhông pêi cheăng kâ ƀă mơjiâng thôn pơlê nếo. Pôa K’Sung, Kăn pơlê Ting Wel Đơm, cheăm Dak Nia, pơlê kong kơdrâm Gia Nghiã phiu ro tối: kơnôm ai Đảng, ai Pôa Hồ, vâi krâ-nhŏng o tung pơlê hiăng ai tơdroăng rêh ối phâi tơtô, hơniâp ro.

“Tung mâu hneăng tơplâ xâ nah, ƀă mâu hdroâng kuăn ngo akố, đi đo loi tơngah kơ Đảng. Ta troh a hâi kố, vâi krâ-nhŏng o xuân loi tơngah, rak vế, pêi pro tiô troăng pơkâ, troăng tơdjâ dêi Đảng, luât xiâm dêi Tơnêi têa, đi đo tơrŭm vâ rak vế tơniăn tơdroăng rêh ối hâi kố ƀă đi đo tơrŭm vâ mơnhông rêh ối - pêi cheăng kâ rế hía rế châ tơtêk, mơnhông hên ó tâ, luâ tâ kơ hdrối nah, kuăn pơlê chiâng kro, tơnêi têa chiâng rơdêi”.

Pôa Hồ Chí Minh-Kăn xiâm hnê ngăn tơnêi têa hneăng apoăng hiăng prôk hơngế châ 55 hơnăm kố, la tuăn mơno dêi Pôa xuân u ối đi đo ƀă kuăn pơlê Việt Nam. Tâi tâng Đảng, tâi tâng kuăn pơlê pin khŏm mơ-eăm “tơrŭm kơdo mơ-eăm, mơnhông môi tơnêi têa Việt Nam hơniâp lĕm, môi tuăn, tơniăn krê, pêi tro tiô hiâm mơno kuăn pơlê ƀă tơtêk kro mơdrŏng” môi tiah hiâm tuăn ki pói rơhêng vâ a chôu phut ki mơ’nui dế ối rêh nah dêi Pôa Hồ Chí Minh.