Ki nhên, Vi ƀan hnê ngăn tơring Kon Plông, kong pơlê Kon Tum pơtroh hlá mơ-éa, pơkâ thế mâu ngế cheăng tung Khu hbrâ ví khía mơhot têa kân lân lu, tí tăng tŏng xo mâu ngế hliăng tâi ƀă hbrâ mơdât kuăn pơlê tiô tơdroăng ki xoăng tíu pơkuâ, rĕng lăm troh a mâu pơlê cheăm vâ ‘nâi tơdroăng, mơnhên tối ki tro lŭp ‘na mâu hngêi trăng, tơmeăm khoăng, tíu pêi cheăng mâu kơ koan, vâ ai túa pơkâ tŏng gum tơtro, ‘mâi mơnhông teăm tơdrêng mâu kế tơmeăm ki tro lŭp xua tơnêi tơdro bro; tơrŭm ƀă Vi ƀan hnê mâu cheăm, pơlê kân tơbleăng mâu troăng hbrâ ví ƀă tơnêi tơdro; ‘nâi nhên hiâm mơno, mơhnhôk kuăn pơlê hmiân tuăn pơtối pêi cheăng, ƀă tơniăn tung rêh ối.

Mâu kơ koan, tíu pêi cheăng ối tung Vi ƀan hnê ngăn tơring ƀă Vi ƀan hnê ngăn mâu cheăm, pơlê kân Măng Deang ai hnoăng cheăng pôu râng tâi tâng, tối tơbleăng mâu kế tơmeăm ki tro tơ’nhiê, tro lŭp, pơtroh ăm Ƀôrô cheăng ngăn ‘na chiâk deăng ƀă mơnhông thôn pơlê; pơtối séa ngăn, mơnhên tối nhên ki tro tơ’nhiê, tro lŭp, liăn ngân ƀă mơ’no thế tŏng gum ‘mâi rơnêu pơtroh ăm Vi ƀan hnê ngăn tơring séa ngăn tŏng gum ‘na liăn ngân ‘mâi rơnêu.