Hơnăm 2022 ki rơdêi mơdêk tâi tâng kế tơmeăm dêi kong pơlê Kon Tum châ 9,5% tâng pơchông ƀă hơnăm 2021. Tâi tâng kế tơmeăm tiô riân rêm ko mơngế tâk sap ing vâ chê 47 rơtuh liăn tâk troh 52 rơtuh liăn. Nâp liăn tơnêi têa tiô pêi pro 4 rơpâu rơtal liăn, châ tâi tâng kơxô̆ liăn pơcháu. Tung hơnăm kong pơlê Kon Tum tơ’mot 19 tơdroăng tơkêa ‘no liăn bro ƀă tâi tâng kơxô̆ liăn chêh inâi dâng 1.600 rơtal liăn.

Pakĭng tơdroăng ki pêi pro mê, ai 4 tơdroăng pơkâ ki kal kong pơlê Kon Tum ôh tá pêi pro klêi tiô túa pơkâ mơ’no, mê cho: Ki rơdêi mơdêk tâi tâng kế tơmeăm oh tá châ tiô pơkâ tâk sap ing 10% tơngi klêng; Hrê liăn dêi kong pơlê; ‘No liăn pêi cheăng tơdjuôm ƀă Mơjiâng thôn pơlê nếo xuân ôh tá châ tiô pơkâ. Rơtế amê tơdroăng ki hơ’lêh chêh pro hlá mơéa, hơ’lêh tơdroăng ki ‘no liăn cheăng, mơdêk ivá tơxup tơbriât dêi kong pơlê tá hâi hlo nhên khât; Hnoăng cheăng chêl thiăn, bu bro tơbăng mâu tơnêi tơníu dêi mâu tơdroăng tơkêa ki kal ối hrá, tơ’mot ‘no liăn cheăng ối iâ ƀă hên ki ê.

Tung rôh pơchuât pơxiâm po rôh hôp, pôa Dương Văn Trang, kăn pơkuâ ngăn Đảng, Kăn hnê ngăn Hô̆i đong kong pơlê Kon Tum pơkâ thế mâu kăn tơkŭm pêi pro nhên mâu tơdroăng ki tá hâi pêi pro klêi ƀă mơnhên tiô troăng hơlâ ‘mâi rơnêu tung hơnăm 2023.