Tơdroăng tơkêa bro tíu păn chu xúa kơmăi kơmok chal nếo ƀă pêt hdrê loăng tŭm túa dế châ Kŏng ti Tơlo liăn Thiên Thành Tài tơbleăng a thôn Khơk Klong, cheăm tơkăng kong Rờ Kơi, tơring Sa Thầy, kong pơlê kon Tum. Tiô kăn pơkuâ Kŏng ti kố, tơdroăng tơkêa kố châ bro a ƀăng tơnêi lối 21 ha, tâi tâng kơxô̆ liăn ‘no ai 165 rơtal.

Ki xiâm dêi tơdroăng tơkêa kố cho rêm hơnăm păn péa rôh chu tâi tâng mâu kuăn chu păn 48 rơpâu pŭm. Rơtế a mê cho mơ’no trếo ‘mêi, pêt mâu hdrê loăng tŭm túa ƀă kơxô̆ liăn châ xo tiô tối hdrối rêm hơnăm dâng 300 rơtal ƀă tăng cheăng pêi ăm dâng 100 ngế pêi cheăng.

Pôa Phạm Văn Thành, Kăn hnê ngăn Hô̆i đong Quản trị Kŏng ti Tơlo liăn Thiên Thành Tài ăm ‘nâi, tung plâ tơbleăng tơdroăng tơkêa, Kŏng ti đi đo châ xo tơdroăng ki tơƀrê sap ing khu kăn pơkuâ ƀă kơvâ cheăng ki ai tơdjâk troh kong pơlê Kon Tum:

“Ngin pơkâ ‘no liăn cheăng a tíu kố ai tơdroăng ki tŏng kum kơhnâ khât dêi Vi ƀan hnê ngăn kong pơlê Kon Tum xuân môi tiah dêi Vi ƀan hnê ngăn tơring Sa Thầy hiăng pro tơ’lêi hlâu ăm Kŏng ti tung pơla séa ngăn, rah xo tíu xuân môi tiah tơdroăng ki gu tơnêi.

Má péa cho khu râ, kơvâ cheăng xuân hiăng pro tơ’lêi hlâu ăm Kŏng ti tung tơdroăng ki pêi klêi mâu hlá mơ-éa vâ Kŏng ti chiâng vâ tơbleăng tung tơdroăng ki rĕng má môi”.

Vâ tơ’mot mâu khu ki ‘no liăn cheăng ai liăn mơnhông cheăng kâ rêh ối pơlê pơla klêi kơ’nâi Hneăng hôp Đảng ƀô̆ kong pơlê Kon Tum rôh má 16 a khế 9/2020, kong pơlê Kon Tum tơkŭm hơ’lêh tơdroăng ki ‘no liăn cheăng, mơdêk tơbleăng tơdroăng kal ‘na mâu tơdroăng tơkêa krếo thế ‘no liăn ƀă hbrâ rơnáu ivá rơtế ƀă khu mơdró kâ.

Vâ ‘mâi rơnêu, pơkâ tơleăng teăm tơdrêng mâu tơdroăng ki tơvâ tơvân dêi khu ki ‘no liăn cheăng, Vi ƀan hnê ngăn kong pơlê Kon Tum rak vế tơdroăng “Kơphế khu mơdró kâ, khu tê mơdró” a tơdế rêm khế; tơkŭm po “Rôh hôp tơpui tơno ƀă khu mơdró kâ” môi hơnăm 2 hdroh. Rơtế ƀă râ kong pơlê, a péa kơpong cheăng kâ ki xiâm, khu kăn pơkuâ pơlê kong kơdrâm Kon Tum ƀă tơring Kon Plông xuân rak vế hên tơdroăng ki trâm, tơpui tơno, tŏng kum khu mơdró kâ troh tăng ‘nâi vâ ‘no liăn cheăng xuân môi tiah pêt mơjiâng, tê mơdró.

Pôa Nguyễn Thanh Mân, Kăn hnê ngăn Vi ƀan pơlê kong kơdrâm Kon Tum, ăm ‘nâi:

“Drêng mâu khu ki ‘no liăn cheăng troh hriăn ngăn mê pơlê kong kơdrâm kô cho tíu xiâm vâ tơkŭm mâu tơdroăng ki mâu khu ki ‘no liăn cheăng, môi tiah tơbleăng ‘na tơnê tơníu, tơbleăng ‘na mâu hlá mơ-éa. Pơlê kong kơdrâm rơtế ƀă mâu khu râ, kơvâ cheăng ki xiâm vâ tí tăng ‘nâi plĕng ăm Vi ƀan hnê ngăn kong pơlê pro tơ’lêi hlâu má môi ăm khu ki ‘no liăn cheăng.

Tâng peăng khu ‘no liăn cheăng trâm pá mê pơlê kong kơdrâm kô cho ngế ki apoăng pơkâ tơleăng ôh tá ăm khu ‘no liăn cheăng lăm tăng ‘nâi xêh”.

Ƀă hên troăng hơlâ rơkê, klêi kơ’nâi lối 2 hơnăm tơbleăng pêi pro Pơkâ Hneăng hôp 16 Đảng ƀô̆ kong pơlê, Kon Tum hiăng tơ’mot châ 68 tơdroăng tơkêa ‘no liăn cheăng ƀă tâi tâng liăn chêh lối 18 rơpâu rơtal liăn. Ki rơhêng vâ tối ôh ti xê to pêi pro a kơpong ki tơ’lêi hlâu, mê a mâu tơring hngế hngo, kơpong hdroâng kuăn ngo ối trâm hên xơpá môi tiah Tu Mrông, Đăk Tô, Sa Thầy ƀă hên ki ê xuân tơ’mot khu ‘no liăn cheăng ƀă hên tơdroăng tơkêa hiăng tơbleăng ki khât.

Jâ Huỳnh Thị Thúy Hà, Kăn phŏ pơkuâ Khu pơkâ ƀă ‘no liăn cheăng kong pơlê Kon Tum, ăm ‘nâi kong pơlê dế pơtối krếo thế mâu khu ki ‘no liăn cheăng tung hên kơvâ, môi tiah: uâ pơliê bro pơkeăng; pêi chiâk deăng; on tơhrik ki ‘mâi bro; ôm hyô; pêi chiâk deăng xúa kơmăi kơmok chal nếo ƀă hên ki ê. Vâ kong pơlê Kon Tum chiâng tíu troh dêi khu ki ‘no liăn cheăng, kong pơlê dế kơhnâ hơ’lêh tơdroăng ki ‘no liăn cheăng tê mơdró:

“Kong pơlê mơnhên tơdroăng ki hơ’lêh ‘no liăn tê mơdró, tŏng kum khu mơdró kâ cho môi tơdroăng ki kal vâ ‘no liăn cheăng, mơnhông mơdêk cheăng kâ rêh ối pơlê dêi kong pơlê. Kong pơlê tơtrŏng mơdêk hơ’lêh chêh pro hlá mơ-éa. Rêm râ, mâu kơvâ cheăng mơdêk rĕng tơdroăng ki ‘no liăn vâ khu mơdró kâ rĕng tơbleăng tơdroăng tơkêa châ teăm tơdrêng ƀă tơƀrê. Kơhnâ pro tơ’lêi hlâu tơ’mot mâu khu ‘no liăn ki kân ai ivá, ai hiâm mơno hâk vâ mot tung pơlê”.

Vâ bro tơdroăng ‘no liăn cheăng tơdâng tơ’mô, tơdrăng, tro luât, kong pơlê Kon Tum nôkố xuân dế khŏm mơ-eăm pơkâ tơleăng mâu tơdroăng ki tá hâi pêi pro klêi, kơdroh a mâu tơdroăng tơkêa ki khu ‘no liăn cheăng ôh tá pêi pro tro tơdroăng tơhrâ. Tơdrêng a mê hlối khŏm pơkâ tơleăng kơtăng mâu ngế ki krê, mâu khu tơrŭm ki bro xơpá, mơnhêa mơnheăn tung pơla khu ‘no liăn cheăng tăng ‘nâi, séa ngăn ƀă ‘no liăn cheăng a kong pơlê.