Kơxo lơ 28/2, a pơlê kân Sa Thầy, Khu kăn pơkuâ ngăn Đoân kong pơlê Kon Tum tơkŭm po Leh mơjiâng pêi tơdroăng cheăng tung Khế Droh rơtăm hơnăm 2023 rơtế ƀă mơgêi Tơdroăng pleăng hnoăng tơná a rơnó hngíu hơnăm 2023 rơtế ƀă Rơnó hơngui hơnăm 2023 ƀă veăng ai lối 500 ngế đoân viên, droh rơtăm. Dó inâi: “Hơnăm ối nếo djâ troăng ahdrối pơ’lêh kơxô̆”. Khế Droh rơtăm hơnăm kố châ Khu pơkuâ ngăn Đoân Kon Tum tơkŭm po sap hâi lơ 1/3 troh lơ 31/3/2023 ƀă tơdroăng pêi pro: Mơdêk pơ’lêh kơxô̆ tơdâng tơ’mô tung tâi tâng mâu tơdroăng cheăng Đoân; Pơtối rak vế hnoăng cheăng dêi droh rơtăm tung pơ̆’lêh kơxô̆; Xúa kơmăi kŏng ngĕ kơxô̆ tung tơdroăng rêh ối ƀă mơdêk ivá ‘na kơxô̆ ăm mâu droh rơtăm mâu phô̆m xông kân, mâu vâi hdrêng.

Klêi mê, pơtối rak hnoăng cheăng pêi ahdrối, pleăng hnoăng tơná, ivá rơkê hriăn plĕng dêi khu droh rơtăm tung pêi mâu tơmeăm khoăng, peăng tơdroăng cheăng veăng pê klêi hnoăng cheăng kal kí tơdroăng cheăng hmâ pêi ƀă veăng mơnhông cheăng kâ rêh ối a kong pơlê, tíu pêi cheăng.