Vâ mơhnhôk, pơro kơ vâi hdrêng ki xơpá, hâi lơ 1/6, a pơlê kong kơdrâm Kon Tum, Khu kring vế hnoăng rêh ối ƀă veăng kum mâu ki chó chêng kŏng kong pơlê Kon Tum tơkŭm po hôp khĕn kơdeăn vâi hdrêng xơpá, ai hnoăng ‘nâi kơdôu mơ-eăm tung hriâm ƀă veăng kơjo kum vâi hdrêng hơnăm 2023.

A rôh hôp, Khu ngăn mâu vâi o ƀă kơjo kum mâu ngế ki chó chêng kŏng kong pơlê Kon Tum hiăng diâp Hlá mơ-éa kơdeăn khĕn ăm 20 ngế vâi hdrêng ki kơtiê xơpá ‘nâi kơdôu mơ-eăm tung hriâm; hbru 100 kơxu tơmeăm ăm mâu vâi o ki kơhnâ tung hriâm hơnăm 2023 ƀă tơbleăng pơkâ khĕn kơdeăn mâu Khu veăng kơjo kum.

Kong pơlê Kon Tum nôkố ai lối 40 rơpâu ngế vâi hdrêng kơtiê xơpá cho rơpŏng mâu kơtiê ƀă vâ chê kơtiê. Tung pơla hdrối kố nah, Khu ngăn mâu vâi hdrêng ƀă kơjo kum vâi hdrêng ki chó dêi kong pơlê hiăng tơrŭm cheăng, tơdah xo liăn, tơmeăm kơnâ 3,8 rơtal liăn ing mâu khu ai tuăn hơ-ui, mâu khu mơdró,. mâu khu râ veăng kum lối 10 rơpâu 600 ngế ki chó ƀă vâi hdrêng kơtiê xơpá ó.