Hơnăm hriâm 2024 – 2025 kong pơlê Kon Tum ai lối 167.000 ngế vâi hdrêng, hok tro, tung mê, ai lối 98.000 ngế vâi hdrêng, hok tro hdroâng kuăn ngo. Sap ing hâi lơ 12/8, krê mâu vâi muăn hok tro lâm 1 hdroâng kuăn ngo dêi kong pơlê hiăng tơkŭm a hngêi trung vâ thái cô thăm hnê nâl Xuăn kum mâu vâi o thăm loi tơngah a hơnăm hriâm nếo.

A mâu thôn pơlê, nôu pâ mâu vâi o hok tro xuân tơmâng troh rơxông la ngiâ. Nâ Y Hrâm, pơlê Kon Vơng Kia, pơlê kân Măng Deang, tơring Kon Plông, tối ăm ‘nâi:

“Hbrâ mot hơnăm hriâm nếo, rơpŏng á hiăng rôe ăm kuăn ‘nĕng hmân ếo, chêng khŏng, kơtong, loăng chêh, kơxop mơ-éa hriâm mơ-éa chêh.. Rơpŏng xuân hbrâ liăn nâp hriâm apoăng hơnăm ƀă rôe tŭm tâi tâng tơmeăm xúa tung hriâm tâp. Troăng prôk ing hngêi ối troh hngêi trung xuân hơngế, xua mê rơpŏng xuân hiăng hbrâ rơxế krê vâ chiân kuăn ‘nĕng troh hngêi trung hriâm tâp tơniăn, pói vâ kuăn dêi tơná hriâm tâp rơkê păng ‘nâng’’.

Hơnăm hriâm nếo 2024 - 2025, kơvâ hnê hriâm ƀă hnê mơjiâng tuăn ngôa rơkê kong pơlê Kon Tum tơtrŏng po rơdâ pêi pro châ tơƀrê Roh mơhnhôk ‘’Pro pơhlêh troăng tơmiât, troăng pêi dêi kuăn pơlê hhdroâng kuăn ngo, pro ăm kuăn pơlê hdroâng kuăn ngo mơ-eăm hluăn ing kơtiê krá tơniăn’’; po rơdâ troăng pêi ăm hok tro kâ koi ối pơtê hâi dế a hngêi trung kuăn pơlê păn; mơdêk kơxô̆ hok tro hdroâng kuăn ngo ki kơhnâ ƀă hbrâ mơdât lôi pơtê hriâm.