Kong tô khăng khoăng dêi rơnó tô Tây Nguyên, ƀăng klâng kân rơdâ lối 11 ha dêi kuăn pơlê thôn Gia Xiêng, cheăm Rờ Kơi, tơring Sa Thầy, kong pơlê Kon Tum xuân ngiât lĕm mơngiơk dêi báu klâng rơnó xeăng tô. Ngoh A Thun, kăn pơkuâ thôn Gia Xiêng tối ăm ‘nâi, tâi tâng ƀăng deăng klâng kơnôm to têa ing long rơchôa têa Đăk Hlang. Vâ tăng têa tôh klâng thế xúa kơdĭng têa ƀă châ tơƀrê:

“Drêng kố klâng dêi thôn Gia Xiêng têa xuân ối tŭm. Á drêng rêm roh hôp thôn xuân pơtâng tối vâi krâ kuăn pơlê vâ mơ’no têa mot tung klâng tơtro. Thế ‘mot têa rêm kơ’noăng klâng, mơ’no a kơ’noăng ki a’ngêi hdrối, klêi mê têa hiu troh kơ’noăng ki pá xôp tơtro. Á đi đo séa ngăn hno têa, mơhnhôk vâi krâ kuăn pơlê kui tah trâp vâ bê têa tung rơnó xeăng tô kố’’.

Rơtế ƀă xúa têa kơdĭng ƀă châ tơƀrê, vâ kơdroh tro lŭp ƀă ƀăng klâng báu klâng rơnó Xeăng tô xua kong tô khăng khoăng hneăng mơ’nui rơnó tô pro, a mâu cheăm, môi tiah: Sa Nghĩa, Sa Bình, Ya Ly ƀă hía hé dêi tơring Sa Thầy hrĭng rơpŏng hiăng pêt alâi, pôm loăng, kơchâi drêh, prá alâi ƀă hía hé, ôh tá pêt báu xếo xua ôh tá châ hên. Hngêi ai 5 sao klâng, pôa Phan Lương, thôn Hòa Bình, cheăm Sa Nghĩa tối ăm ‘nâi, vâ ví tơdroăng ôh tá tŭm têa tôh ăm rơnó xeăng tô, to lâi hơnăm kố pôa pơ’lêh 3 sao pêt alâi, pêi lo châ liăn ối hên tâ pêt báu:

“Pêt alâi tâng pơchông ƀă pêt báu klâng mê niân tâ xua pêt báu klâng mê á thế troh lăm ngăn ki má lối cho rơnó xeăng tô vâ mơ’no têa mot tung klâng. Ƀă alâi 10 hâi á nếo lăm ngăn mơ’no têa môi xôh. Tơdroăng má péa rak ngăn chôa ‘lâng tâ, xuân ôh tá tro tâ pơreăng hên ôh. Pơtih môi tiah ôa, hdrong mê iâ tâ báu. Tê tá hnông, má péa nếo tơmeăm mê vâi vâ pro chả ram. Tơdroăng má pái cho xiâm, 1.000 met karê mê tê krê xiâm tê vâ châ 1 rơtuh liăn. Pêt alâi tâng pơchông pêt báu mê châ liăn hên tâ châ péa xôh’’.

Tơring Sa Thầy cho môi tung mâu tíu khăng khoăng ó dêi kong pơlê Kon Tum, rêm hơnăm troh hneăng mơ’nui rơnó tô mê tơdroăng ôh tá bê têa tôh ăm loăng plâi ki má lối ƀăng báu klâng rơnó xeăng tô pơtối ai. Ai hơnăm kong tô khăng khoăng ton, kuăn pơlê dêi tơring tro lŭp tâi tâng chât hectar báu klâng.

Pôa Giả Tấn Đạt, Kăn pơkuâ Ƀơrô pêi chiâk deăng ƀă mơnhông thôn pơlê tơring Sa Thầy, tối ăm ‘nâi kơnôm pêi pro tơdrêng hên troăng tăng têa tôh xua mê tơring hiăng kơdroh châ tro lŭp tung pêt mơjiâng tơmeăm pêi lo ing chiâk deăng:

“Ƀă mâu ƀăng deăng ôh tá ai long rơchôa têa mê pêt rĕng tâ, ki rơhêng vâ tối pêt hdrê tơmeăm ki iâ hâi. Mâu kơpong ôh tá ai ivá ‘na têa tơkŭm pơ’lêh ing loăng plâi ki xúa têa iâ môi tiah kơchâi drêh, alâi ƀă mâu loăng plâi ki ê. Pakĭng mê pơtâng tối, hnê mơhno mâu cheăm, pơlê kân thăm xúa mâu kơxô̆ liăn tơtro vâ kui tah trâp hno têa, hbrâ mơdât tơdroăng têa lo pa kong a mâu long, rơchôa têa. Tơrŭm ƀă Khu pơkuâ long rơchôa têa vâ mơ’no têa tơtro ƀă pơtâng tối kuăn pơlê xúa têa kơdĭng’’.