Kơxê hâi lơ 26/3, tơring Sa Thầy, kong pơlê Kon Tum tơkŭm po leh tơbâ 55 hơnăm Hâi kot mâ dêi mâu lêng trung đoân 209, sư đoân 312 a Chư Tan Kra. Pơchuât tơbleăng a Leh tơbâ tối nhên: “ Tơdroăng tơplâ troh hlâ dêi mâu lêng Trung đoân 209 a Chư Tan Kra khế 3/1968 đi đo cho tơdroăng pơtih ki eăng bâ dêi tuăn hiâm pâ nhoăm tơnêi têa, dêi tuăn mơno khên tơnôu, mơ-eăm chân krá, mơ-eăm tơplâ, khŏm kâi ƀlêi trâng.

Tuăn hiâm ki mê hiăng mơhno djâ troăng xuân ing hnoăng pơkuâ rơkê, troăng rơhlâ hnê tro dêi Đảng pin ƀă Pôa Hồ Chí Minh, kăn xiâm hnê ngăn tơnêi têa vâ  pin ai môi tơnêi têa hơniâp lĕm, tơniăn ƀă tơdroăng rêh ối phâi tơtô, hơniâp ro hâi kố”. Tơbâ hnoăng mâu lêng pơlê kong xiâm Hà Nội  hiăng tơplâ  ta troh hlâ a tíu tơplâ Peăng kơnhŏng Kon Tum, hơnăm 2011 Khu xiâm pơkuâ ngăn lêng pơlê kong xiâm, Khu tí tăng ‘nâi tơdroăng dêi trung đoân 209 hiăng pơxiâm mơjiâng pro kơpong tơbâ Chư Tan Kra. Vi ƀan hnê ngăn kong pơlê Kon Tum hiăng pơxá Tíu ki a ‘ngêi 995 - Chư Tan Kra cho tíu tơbâ ki kân râ kong pơlê.