Kong pơlê Kon Tum dế tơkŭm pêi hên troăng rơhlâ vâ mơdêk rĕng tơdroăng cheăng pêi hngăm hngo xo liăn ngân a mâu khế mơ’nui hơnăm. Pơchông ƀă hơnăm nah kơxô̆ liăn ngân ‘no mơjiâng tơmeăm khoăng tơnêi têa dêi Kon Tum iâ tê. Mê riân troh mơ’nui khế 2, lâp tung kong pơlê bú xo liăn ngân dâng 190 rơtal liăn, hâi châ 7% tơdroăng pơkâ.

Ki xiâm cho tro hôu khĕn, hâi pêi pro kơtăng; tơvâ tơvân tung tơdroăng ‘mâi xĕn chêl thiăn liăn tơnêi, tơmeăm khoăng. Vâ mơdêk rĕng xo liăn ngân ‘no liăn mơjiâng tơmeăm khoăng, Vi ƀan kong pơlê Kon Tum dế pêi kơtăng tơbleăng pêi hên tơdroăng mê cho: mơdêk hnê khĕn, pro tro luât tung xo liăn ngân ‘no mơjiâng tơmeăm khoăng tơnêi têa, pêi tro tơdroăng hbrâ ‘no liăn cheăng; pêi tro luât pơkâ xoăng cheăng pêi, tơrŭm nhên, ‘na hnoăng pơkuâ, hnoăng cheăng pơla kơ koan tíu pêi cheăng tung tơdroăng pê klêi hlá mơ-éa ‘no liăn pêi tơdroăng tơkêa pro; mơdêk rĕng tăng tơnêi, mơjâng tơmeăm khoăng, kơdroh xơpá tơvâ tơvân ‘na tơnêi tơníu.