Hiăng klêi hriâm Đại học kơvâ Luât kinh tế hơnăm 2021, ƀă hên tơdroăng kơhnâ pêi pro, khế 7 xuân tung hơnăm ki ngoh A Nguyên, kuăn ngo Bơhnéa, pơlê Kon Gung châ rah xo pôk pro Kăn phŏ hnê ngăn Đoân dêi Cheăm Đăk Mar, tơring Đăk Hà. Ngoh cho ngế tiô khôp Pâ Xeăng, pơtối rak vế pêi pro kơhnâ khât dêi ivá hơnăm ối nếo, khế 10 hơnăm 2022, a thôn Đăk Mut, ngoh A Nguyên mơjiâng Kâu lak ƀô̆ Droh rơtăm ki tiô khôp mơnhông cheăng kâ tơkŭm ai 15 ngế veăng. Ing tơdroăng păn mơnăn, pro kơdrum pêt loăng plâi, rak ngăn loăng kơphế, loăng plâi kâ pêi cheăng tiô troah hưh cơ, Kâu lak ƀô̆  hiăng kum ăm mâu ngế tung khu pêi châ tơ’mot kơxô̆ liăn. Pôa lê Xuân Hưng, Ngế hnê hnê ngăn Đảng ủy cheăm Đăk Mar, ăm ‘nâi, Đảng ủy cheăm khê̆n kơdeăn khât tơdroăng cheăng pêi tơƀrê ‘nâng dêi Kâu lak ƀô̆ kố.

“Klêi tăng ngăn a hlo Kâu lak ƀô̆  pêi cheăng tơƀrê. Nôkố mâu ngế tung Kâu lak  ƀô̆ hnê ăm dêi rơpó ‘na rak ngăn loăng plâi, mơnăn păn xuân môi tiah tơdroăng hnê ‘na mơnhông cheăng kâ. Tơdroăng pêi pro mê hiăng châ Đảng ủy hnê mơhno troh 2 thôn tung cheăm. Khu ngăn đoân tơring Đăk Hà xuân hiăng po rơdâ túa pêi cheăng dêi droh rơtăm ki tiô khôp Pâ Xeăng mơnhông cheăng kâ tung lâp tơring”.

Châ Đảng Ủy cheăm Đăk Mar, tơring Đăk Hà châ ‘nâi, ăm hriâm tơ’nôm tơná ngoh A Nguyên veăng mơ-eăm há hriâm rơnêu tơná. Khế 7/2023, A Nguyên châ mâu rơpŏng kuăn pơlê thôn Đăk Mut rah xo pro kăn thôn. Xuân tung pơla kố A Nguyên hâk tơngăm châ mot Đảng. Ngoh A Nguyên tối:

“A nháng lăm pôu kơ êng mâu rơpŏng ki xơpá ‘na cheăng kâ, ki pá ‘na tuăn ngôa  a hmâ lăm pôu hnê ăm vâi krâ nhŏng o thế pơ’lêh tuăn tơmiêt, túa pêi cheăng dêi tơná. Thế ‘nâi pro kơdrum pêt tơmeăm pôi tá ăm tơnêi ối xo xo. Troh nôkố a Dak Mút ôh pa ai xêó rơpŏng ki lôi tơnêi ối xo xo. Nôkố rơpŏng ki xuân hiăng loăng pêt kơphế,  loăng sầu riêng, loăng plâi mit’’.

Rêm râ ủy Đảng, mâu kăn ing kong pơlê troh cheăm dêi kong pơlê Kon Tum đi đo tơmâng khât troh mâu kăn ƀô̆ kuăn ngo malối a râ cheăm. Nôkố, tung lối 2.000 ngế kăn ƀô̆ mâu ngế pro kăn pơkuâ tơdroăng cheăng pêi a 102 to cheăm, bêng, pơlê kân dêi kong pơlê ai vâ chê 1.400 ngế kăn ƀô̆ pro kăn pơkuâ ngăn cho mâu kuăn ngo ai vâ chê 68%.

Môi tiah cheăm Măng Bút, tơring Kon Plông, tung kơxô̆ 22 ngế kăn ƀô̆ mâu pro kăn cheăm ta troh 17 ngế kăn ƀô̆ mơngế Rơteăng. Ngoh A Dân, Phŏ hnê ngăn Vi ƀan Kuăn pơlê cheăm Măng Bút,  châ rah xo ing Tơdroăng tơkêa mơnúa rah 600 ngế rơkê hơnăm ối nếo ki hiăng hriâm troh Đại học lăm pro Phŏ hnê ngăn Vi ƀan kuăn pơlê cheăm  dêi 63 to tơring kơtiê  tung lâp tơnêi têa, ‘nâi nhên, tung pơla hriâm pât, mơ-eăm ngoh châ mâu kăn tơmâng khât, veăng kum dêi râ ủy Đảng ƀă mâu kăn cheăm. Tơdroăng kố kum ngoh kơdôu mơ eăm tâ nếo tung hriâm pât rơnêu tơná ƀă pleăng hên tâ nếo hnoăng cheăng tơná mơnhông dêi pơlê xiâm:

“A veăng tung tơdroăng Tơkêa bro rah 600 ngế pro Phŏ hnê ngăn cheăm, châ Đảng, Tơnêi têa tơmâng khât mơjiâng khu kăn hơnăm ối nếo, kăn ƀô̆  kuăn ngo kơxô̆ mơngế ki vâ pêi cheăng, a loi khât mơ-eăm ƀă châ rah xo pro Phŏ hnê ngăn cheăm hneăng má 2. A hiăng hriâm luâ lâm hnê Trung cấp lý luận chính trị, lâm chuyên viên. Nôkố châ râ ủy đảng  ƀă mâu kăn cheăm tơmâng khât a dế hbrâ  vâ lăm hriâm lâm Cao cấp lý luận chính trị’’.

Kơ’nâi 33 hơnăm mơjiâng nếo kong pơlê, Kon Tum hiăng mơjiâng khu kăn ƀô̆, mâu ngế pơkuâ mâu tíu pêi cheăng, kơ koan, mâu ngế pêi cheăng a mâu kơ koan tơnêi têa lối 18.000 ngế, tung mê kăn ƀô̆ kuăn ngo lối 4.100 ngế châ lối 22%. Ƀă rêm râ kong pơlê Kon Tum ai 82 ngế kăn ƀô̆ kuăn ngo kơxô̆ mâu ngê pro Phŏ pơkuâ  ƀơrô ƀă tơdâng tơngi klêng; râ tơring ai 225 ngế kăn ƀô̆ kuăn ngo pro kăn  ing Phŏ  ƀă tơdâng tơngi klêng; râ cheăm ai 397 ngế kăn ƀô̆  ối pro bí thư, phŏ bí thư; kăn hnê ngăn, kăn phŏ hnê ngăn  Hô̆i đong Kuăn pơlê, Vi ƀan Kuăn pơlê ƀă râ ngế pơkuâ, ngế phŏ tơrŭm cheăng ‘na kal kí pơlê pơla. Pôa Lê Viết Nam, Phŏ pơkuâ ngăn ‘na rah mơngế mot pêi cheăng  dêi kong pơlê Kon Tum ăm ‘nâi, tơdroăng tăng mơngế pêi cheăng, pơkâ hdró, rah xo  kăn ƀô̆ kuăn ngo đi đo châ Khu ngăn Đảng kong pơlê ƀă Vi ƀan Kuăn pơlê dêi kong pơlê tơmâng khât:

“Kong pơlê hiăng pơkâ tơdroăng tơkêa bro mơjiâng khu kăn ƀô̆ kuăn  ngo. Klêi mê rêm râ ủy đảng ăm hlá mơ-éa hnê mơhno vâ tung tơdroăng pơkâ tăng rah, pôk xo tơmâng khât troh mâu kăn ƀô̆ kŏng chưk cho mâu kuăn ngo. Nôkố hbrâ vâ hôp kân dêi hneăng hên ngế kăn ƀô̆ kuăn ngo a mâu kơ koan, tíu pêi cheăng xuân hiăng châ rah xo hdrối inâi ki hbrâ vâ rah xo to pro kăn hnê ngăn rêm râ, malối cho mâu tíu pêi cheăng cheăm, kơvâ cheăng, mâu tơring, pơlê kong krâm, kong kơdrâm  xuân ai kơxô̆  mơngế kăn ƀô̆ kuăn ngo châ hbrâ rah xo inâi vâ rah pro kăn'.