Kong pơlê Kon Tum hiăng pơkâ túa hâi khế hơnăm hriâm nếo 2024-2025 ƀă tơdroăng ki hriâm mâm non, hriâm phôh thong ƀă hriâm yăo yuk thường xuyên. Môi tung mâu tơdroăng hnê mơhno dêi kong pơlê tung hnoăng cheăng hbrâ rơnáu ăm hơnăm hriâm nếo cho ôh tá ăm ai tơdroăng ki thế nâp liăn ƀă pro pá ăm nôu pâ hok troh apoăng hơnăm hriâm nếo.

Hơnăm hriâm nếo 2024-2025, kong pơlê Kon Tum ai vâ chê 350 hngêi trung mâm non, phôh thong ƀă tâi tâng kơxô̆ lối 160 rơpâu ngế hdrêng ƀă hok tro. Hơnăm hriâm kố kơvâ ngăn hnê hriâm ƀă hnê mơjiâng tuăn ngoâ rơkê kong pơlê kơdo mơ-eăm mơhnhôk tâi tâng vâi hdrêng tung hơnăm hriâm râ má môi lăm troh hngêi trung hriâm; mơhnhôk tâi tâng kơxô̆ ngế hok tro hiăng hriâm klêi râ má môi pơtối mot hriâm lâm 6, tâi tâng hok tro râ má môi châ hriâm 2 xôh tung môi hâi.

Pơxiâm mot tung hơnăm hriâm nếo, Hô̆i đong hnê ngăn kong pơlê Kon Tum hiăng Pơkâ thế kơlo liăn nâp hriâm râ mầm non, hriâm phôh thong kong lâp hơnăm hriâm 2024-2025. Tiah mê, kơlo liăn nâp hriâm a kong pơlê châ klâ kơpong I, II ƀă III. Liăn hriâm iâ má môi cho râ hriâm má péa a kơpong III ƀă 19 rơpâu liăn môi ngế tung môi ngế, hên má môi cho râ mầm non ƀă râ má pái phôh thong a kơpong I ƀă 52 rơpâu liăn môi ngế tung môi khế.