Drêng hlo ai rế hên khu ngế ko kếo, kơtôa loăng, tơdroăng on chếo kâ kong pơtối ai đi đo sap ing khế 3 troh nôkố, mê Vi ƀan hnê ngăn kong pơlê Kon Tum a hâi lơ 17/3 hiăng pơkâ thế khu râ, mâu kơvâ cheăng thăm mơdêk tơdroăng pơkuâ, rak vế, hbrâ tơpâ mơdât on chếo kâ kong. Tiah mê, Vi ƀan hnê ngăn kong pơlê Kon Tum pơkâ thế Khu ngăn ‘na chiâk deăng ƀă mơnhông thôn pơlê mơjiâng mâu Tôh pơkuâ cheăng lăm seá ngăn ‘na tơdroăng pơkuâ, rak vế ngăn kong, hbrâ tơpâ mơdât on chếo kâ kong, maluâ ƀă mâu tơring cheăm ki ai kong hên, kong hiăng khăng răng hlá tơ’lê tro on chếo kâ; teăm hlo vâ rĕng ‘mâi rơnêu, hnê tối, mơhnhôk, hnê djâ mâu khu râ, pơkuâ cheăng tơkŭm pêi pro tơdrăng khât tung hnoăng pơkuâ, kring vê, rak ngăn kong, hbrâ tơpâ mơdât on chêó kâ kong.

Kăn hnê ngăn Vi ƀan mâu tơring, pơlê kong kơdrâm, mâu khu râ ki pơkuâ ngăn kong ƀă mâu kơvâ cheăng ki ai tơdjâk troh tơkŭm pêi pro kơhnâ, tơdrăng, kơtăng hnoăng pơkuâ ngăn, rak vế kong, hbrâ tơpâ mơdât on chếo kâ kong; tăng rah khu ngế ki tơpâ mơdât on tro tiô tơdroăng pơkâ; thăm mơdêk  hnoăng cheăng lăm seá ngăn, mơnhên mâu tíu ki ai kơpong ki tro on chếo kâ, teăm rĕng hlo ƀă tơpâ mơdât on hdrối ai tơdrêng on pơxiâm chếo kâ hlá pê, nhâ kong.