Rơpŏng pôa Hoàng Trung Thành ai 8 sào tơnêi pêt kơphế tơvât ƀă loăng plâi sầu riêng a tơdế thôn Tân Sơn, cheăm Ea Yông. Kơpong chiâk ki mê ai tơdế cho tơnêi dêi tơdroăng tơkêa bro troăng kân tơdrăng sap Khánh Hòa – Ƀuôn Ma Thuột tơkâ luâ. Pôa tối, tâng tối lối 4 sao tơnêi chiâk dêi rơpŏng hngêi pôa cho tro tung tơnêi xo tơvêh mơjiâng tơdroăng tơkêa bro troăng  mê rơpŏng hngêi xuân ăm xo, xua mê cho troăng rơhlâ dêi Đảng, Tơnêi têa. Troăng mơjiâng pro klêi kô veăng mơnhông cheăng kâ - rêh ối ăm ôh tí xê to tơring Krông Pač mê ối pơxúa ăm lâp kong pơlê Dak Lak thăm nếo pơxúa tá kơpong Tây Nguyên.

Tơdế hơnăm 2022, kăn ƀô̆ ngăn tơnêi hiăng troh tâp loăng hdró, ƀă vâ chê troh Têt Lo hơnăm nếo 2023 kố nah hiăng vê hdró, lăm ngăn ƀă pro hlá mơ-éa chêh vâ tơbleăng mâu tơdroăng cheăng pêi pơtối cho chêl tâi liăn ‘mâi xĕn tơnêi, tơmeăm khoăng.

Pôa Hoàng Trung Thành tối:

“Mâu kăn ƀô̆ séa ngăn troh tối tơbleăng ăm kuăn pơlê, ngin djâ vâi lăm troh ngăn tơnêi ki xo tơvêh, vâi hnhâng kơxái tâp loăng hdró ing apoăng troh mơ’nui, riên xiâm loăng kơ’nâi mê vâ chêl thiăn liăn. Rêm pâ tơrŭm vê hdró, riân ngăn rơtế ƀă rơpŏng hngêi hlo hiăng tro tơniăn vâ môi tuăn’’.

A thôn Tân Sơn, cheăm Ea Yông rơpŏng pôa Lê Đình Thiên xuân ai 4 sào tơnêi pêt kơphế, tiu, cho tơnêi ki tro xo tơvêh 1/4 ƀăng tơnêi. Pôa Thiên ăm ‘nâi, troăng rơhlâ dêi Đảng ƀă luât Tơnêi têa mê rơpŏng hngêi pôa vâ môi tuăn. Pôa bú púi vâ tiah kố, tơdroăng chêl thiăn liăn ‘mâi xĕn tơnêi chêl xiâm loăng châ pêi pro tơdrăng ôh tá kơtôa, ví ki tro lŭp ăm kuăn pơlê.

Pôa Lê Đình Thiên tối nhên troăng rơhlâ tơná:

“Pơtih tung thôn ai hên tíu nôkố 500-600 rơtuh/sào, mê cho kơdrum loăng vâi ai hên plâi sầu riêng; hên xiâm tiu, kơphế rơpâ tâ sap 300-400 rơtuh/sao. Troăng kân tơdrăng lĕm châ châl thiăn gá tơxâng mê ôh tá ai, la kuăn pơlê bú púi vâ tơ’mô yă pơkâ, lơ rơpâ tâ xuân thế châ 70-80% mê kuăn pơlê ngin  vâ môi tuăn”.

Cheăm Ea Yông, tơring Krông Pač ai 193 ƀăng tơnêi dêi 107 rơpŏng ƀă môi to hngêi khôp tung kơpong tơdroăng tơkêa pro troăng kân tơdrăng Khánh Hòa – Ƀuôn Ma Thuột. Tâi tâng tơnêi xo tơvêh ai 250 rơpâu 672m2. Pôa Nguyễn Phụng Minh, Kăn hnê ngăn Vi ƀan cheăm ăm ‘nâi, nôkố hiăng ai 192/193 ƀăng tơnêi, châ vê hdró ngăn klêi tơdroăng riân  ngăn  tơnêi loăng plâi; tôh riân ngăn xuân dế pro hlá mơ-éa pơcháu ăm Tíu xiâm mơdêk rak ngăn ‘măn kơdĭng tơring Krông Păk vâ mơjiâng mâu troăng rơhlâ chêl thiăn:

“Ngin pơcháu tâi tâng hồ sơ ki tơdjâk troh ăm Tíu xiâm rak liăn ‘măn kơdĭng dêi tơring. Ing mê, mâu khu pêi cheăng dêi tơring kố pơkâ yăng ƀă chêh hlá mơ-éa ăm nếo a cheăm tơbleăng rôh má 1, krếo kuăn pơlê lăm ngăn. Tâng rơpŏng ki hâi vâ môi tuăn rôh má 1, ngin tơmâng xo tơdroăng kuăn pơlê tối pơtroh ăm tơring nếo vâ ‘mâi rơnêu, klêi mê pơkâ nếo roh má 2. Ƀă drêng pơkâ rôh má 2 kuăn pơlê môi tuăn, ôh tá tơpui klâi xếo, mê pơkâ nhên khât hlối roh má 3 kô krếo kuăn pơlê lăm xo dêi liăn ki chêl thiăn”.

Tơdroăng tơkêa bro troăng kân tơdrăng Khánh Hòa - Ƀuôn Ma Thuột  ai tâi tâng ki xŏn vâ chê 118 km, tơkâ luâ 4 tơring dêi kong pơlê Dak Lak, mê cho: Krông Pắk, Krông Bông, Ea Kar ƀă M’Drak  ƀă pơlê kong krâm Ninh Hòa dêi kong pơlê Khánh Hòa. Tung mê krê to tơring Krông Pač ai ki xŏn má môi dêi troăng lối 33 km, tơkâ luâ 8 to cheăm, mê cho: Hòa Đông, Ea Knuêč, Ea Yông, Ea Kênh, Hòa Tiến, Tân Tiến, Ea Uy ƀă Vụ Bổn. Tâi tâng tơnêi xo tơvêh lối 200 ha ƀă dâng 200 ha hang lơng mơjiâng pro dêi lối 1.000 rơpŏng ƀă mâu khu tơrŭm cheăng ki ê.

Jâ Ngô Thị Minh Trinh –  Kăn phŏ hnê ngăn tơring Krông Pač, ngế cheăng tung Hô̆i đong chêl thiăn gu tơbăng tơnêi tung tơring tối, troh nôkố, tơring hiăng pê klêi vâ chê 2.000 trích lục, châ 98% ƀăng tơnêi kal ‘mâi xĕn; mơjiâng chêh inâi 157/208 rơpŏng mơjiâng pro tơdroăng tơkêa bro pơtối pro pơlê nếo; mơhno pro a tơnêi 16,5 ha pro 3 kơpong pơlê nếo dêi mâu cheăm Tân Tiến, Vụ Bổn ƀă Ea Knuêč.

Tiô jâ Trinh, vâ ví tơdroăng “tơvâ tơvân tá kâi đeăng’’ tung tơdroăng chêl thiăn ‘mâi xĕn tơnêi ki hên tơdroăng tơkêa bro rơpâu rơtal liăn a Dak Lak dế trâm, tơring kố pêi nhên tơdroăng cheăng mê, tơbleăng nhên, tơdrăng, vâ tơniăn hnoăng ki pơxúa dêi kuăn pơlê:

“Ngin kĭ tơkêa ƀă tíu pêi cheăng hnê tối, tơkŭm po séa ngăn troh tơrêm ƀă tơnêi ôh tá tiô kơpong lơ môi to cheăm tơdjuôm môi tiah mê kô pơkâ yă. Ƀă tơdroăng séa ngăn kơtăng ti mê, a tơmiât kuăn pơlê kô môi tuăn, xúa gá tơtro. Ôh tá chiâng pin pêi cheăng xúa ki kố ki mê, rêm ngế thế pro ti lâi vâ tơniăn tơtro pơla ki pơxúa dêi kuăn pơlê ƀă tơnêi têa ƀă thế ing tơdroăng pơkâ dêi luât ăm phêp’’.

Ƀă tơdroăng thâ pêi pro, tro tung tơdroăng cheăng xo tơvêh tơnêi ôh tá xê to a tơring Krông Pač, tơngah tơmeăm khoăng kô châ mơjiâng pro klêi tiô tơdroăng hiăng tơhrâ hdrối hâi lơ 30/6 la ngiâ. Troăng kân tơdrăng lĕm Ƀuôn Ma Thuột – Khánh Hòa tơdjêp ƀă tíu xiâm kơpong Tây Nguyên - Peăng Hdroh tơdế tơnêi têa. Tơdjêp ƀă “kong”  ƀă “têa kơx”  kô pê klêi tro tiô tơdroăng pơkâ, pro hlâu mơnhông mơdêk cheăng kâ, ôm hyô, tơ’mot hên khu ‘no liăn cheăng, pro pơxúa ăm rơxế kơtâu rĕng, tơniăn.