Hâi lơ 14/7/2016, pôa Nguyễn Phú Trọng - Kăn xiâm pơkuâ hnê ngăn Đảng hiăng lăm pôu cheăm Bản Bo, tơring Tam Đường, kong pơlê Lai Châu. Mâu rơkong tơpui, mơhnhôk dêi Kăn xiâm hnê ngăn Đảng hiăng chiâng ivá tơ’mot rơdêi vâ kuăn pơlê, kăn pơkuâ cheăm Bản Bo mơ-eăm hluăn ing kơtiê. Chôu rơkong mơhnhôk, hnê khĕn dêi Kăn xiâm hnê ngăn Đảng, kăn pơkuâ ƀă Kuăn pơlê mâu hdroâng kuăn ngo Bản Bo mơ-eăm tơkâ luâ pá puât vâ hâi kố, Bản Bo chiâng chía niân.

Đảng ƀô̆ kăn pơkuâ ƀă Kuăn pơlê mâu hdroâng kuăn ngo cheăm Bản Bo đi đo chôu vế mâu rơkong pơchân dêi Kăn xiâm hnê ngăn Đảng; mê cho tơkŭm mơnhông cheăng kâ ƀă pêi chiâk pêi deăng, mơjiâng thôn pơlê nếo, xúa ki rơdêi vâ pêt mâu hdrê loăng plâi kâ, păn mơnăn mơnôa í peâp, pêt chế tro bă tê mơdró vâ tíu tê dêi chế ƀă rế hơ’lêh troăng tơmiât mơjiâng tơdroăng vâ tơ’mot tơmối ôm hyô.

-A kơpong tơkăng kong dêi tơring Tuy Đức, kong pơlê Dak Nông, tâng tối pôa Nguyễn Phú Trọng Kăn xiâm pơkuâ hnê ngăn Đảng hiăng hlâ, kăn ƀô̆, đảng viên ƀă mâu kuăn pơlê hdroâng kuăn ngo mơjo pâ kơ pôa Ngế kăn pơkuâ plâ rơxông xua tơnêi têa, xua kuăn pơlê. Pôa Điểu Khanh, kuăn ngo M’Nông, kăn phŏ hnê ngăn Vi ƀan cheăm  Quảng Trực tối.

“Sap tíu tơkăng kong hơngế hơngo, tâng tối pôa Nguyễn Phú Trọng - Kăn xiâm pơkuâ hnê ngăn Đảng hiăng kơtê ihiâm, kăn ƀô̆ đảng viên ƀă kuăn pơlê cheăm Quảng Trực pâ mơjo khât kơ ngế kăn pơkuâ ki rơkê xua tơnêi têa, xua kuăn pơlê, môi ngế ki djâ troăng bâ eăng lĕm ‘na hiâm mơno kăch măng. Kố cho tơdroăng ki hía kân dêi Đảng, Tơnêi têa, dêi kuăn pơlê, malối tung pơla tơnêi têa pin dế tơbleăng pêi kơtăng mâu tơdroăng mơjiâng Đảng, plâ mơdât mâu ki kâ kơluâ, kâ kơveăm  ki ai  hdró kân  dêi pôa Nguyễn Phú Trọng - Kăn xiâm pơkuâ hnê ngăn Đảng. Kăn ƀô̆ đảng viên ƀă kuăn pơlê mâu hdroâng kuăn ngo tung cheăm đi đo pâ rơkong Kăn xiâm pơkuâ hnê ngăn pơchân, thế đi đo môi tuăn tơrŭm dêi rơpó, môi tuăn loi khât a hnoăng pơkuâ hnê mơhno dêi Đảng, Tơnêi têa, pơtối ‘no hnoăng hriâm, mơ-eăm  mơjiâng kơpong tơkăng kong xông mơdêi kro mơdrŏng’’.

-Xuân môi tiah mâu hdroâng kuăn ngo nhŏng o ki ê tung lâp tơnêi têa, drêng tâng tối pôa Nguyễn Phú Trọng - Kăn xiâm pơkuâ hnê ngăn Đảng prôk lêk, kuăn pơlê hdroâng kuăn ngo Chăm, kăn ƀô̆ ki hiăng pơtê cheăng cho mơngế Chăm a cheăm Phan Hiệp, tơring Bắc Bình, kong pơlê Bình Thuận ăm ‘nâi, klêi tơmâng ngăn mâu ƀai pơchuât a mâu rôh hôp ki kân dêi tơnêi têa, pôa hâk vâ khât ƀă mâu tơdroăng ki kal tơdjâk troh tơdroăng loi tĭng tiô khôp, hdroâng kuăn ngo; ing mê, mơhno ivá rơdêi kân dêi khu tơrŭm tâi tâng hdroâng kuăn ngo tung hnoăng cheăng mơnhông cheăng kâ rêh ối pơlê pơla tơnêi têa:

“Drêng tâng tối Meh Nguyễn Phú Trọng, Kăn xiâm pơkuâ hnê ngăn Đảng prôk lêk, tung plâi nuih á xuân môi tiah tâi tâng mâu vâi krâ nhŏng o Chăm ƀriê tung hiâm mơno khât. Meh Trọng hía lôi ‘măn chôu ăm tâi tâng hdroâng mơngế Việt Nam tơdroăng khéa hơ’nêng. Xua plâ rơxông dêi tơná, Meh hiăng xúa tâi tuăn ihiâm, ivá bă mơno pleăng ăm Tơnêi têa, pro ăm tơnêi têa Việt Nam kro mơdrŏng ƀă krá rơdêi. Meh cho môi ngế kăn pơkuâ khên tơnôu a Việt Nam, Meh hía lôi ‘măn chôu tơdroăng ki lĕm tro tung lâp tơnêi têa môi tiah ki xú hŏm tơdjâk”.

-Tâng tối pôa Nguyễn Phú Trọng - Kăn xiâm pơkuâ hnê ngăn Đảng hiăng hlâ cho tơdroăng mơjo pâ khât pá kâi tối ƀă kuăn pơlê rêm râ, tung mê ai mâu văn ngê̆ sih tung lâp tơnêi têa tối rơdjuôm ƀă văn ngê̆ sih Khmer tối krê. Ngoh Thạch Sroh, ối a Đôn Châu, tơring Duyên Hải, kong pơlê Trà Vinh, cho ngế tung khu Văn hok ngê̆ thuât kong pơlê ăm ‘nâi, mâu văn ngê̆ sih Khmer tung mâu hơnăm hdrối hiăng ai hên hnoăng veăng pơtối rak vế ƀă pơtối rak tơdroăng ‘na hơdruê xuăng ton nah ki lĕm tro dêi kuăn ngo.

Krê á, tung la ngiâ a kô mơ-eăm pleăng hnoăng cheăng tơná rak vế tơdroăng túa lĕm tro. ‘Na tơdroăng ki pôa Nguyễn Phú Trọng hiăng hlâ lêk mê, ngoh Thạch Sroh tối mơjo pâ khât  ‘nâng.

“Pôa Nguyễn Phú Trọng - Kăn xiâm pơkuâ hnê ngăn Đảng rơkê khât, pôa tơmâng khât ‘nâng ‘na túa lĕm tro hdroâng mơngế Việt Nam tối tơdjuôm, malối tơmâng, mơhnhôk kuăn pơlê mâu hdroâng kuăn ngo thế pơtối rak vế khôi túa, vêa vong ki lĕm tro dêi kuăn ngo tơná. Drêng tâng tối Kăn xiâm pơkuâ hnê ngăn hiăng hlâ lêk, á ƀă kuăn pơlê Khmer khéa hơ’nêng, pâ chôu vế hnoăng pêi ki kân, mâu hiâm mơno ki lĕm tro dêi pôa ƀă mâu hdroâng kuăn ngo”.