A hên tíu, kuăn pơlê ối pro kơƀăng tĭng koh nhoăm, tôu chêng khíu chiân pơ’lâng ngế kăn hnê mơhno ki plâ rơxông pêi cheăng xua tơnêi têa, xua kuăn pơlê. Kơxo má, kuăn pơlê Jarai a pơlê Kép, bêng Đống Đa, pơlê kong kơdrâm Plei Ku, kong pơlê Gia Lai tơkŭm a hngêi hôp kân thôn, têk  nhang koh nhuốm pâ kơ pôa Nguyễn Phú Trọng - Kăn xiâm pơkuâ hnê ngăn Đảng.

Klêi leh pôu ngăn pro kân hnối nhuô̆m, kuăn pơlê tôu chêng pơ’lâng kơ Kăn xiâm hnê ngăn ki má môi dêi Đảng, Ngoh Bưn, ngế tung khu tŏn chêng pơlê Kép, rơrêk tung hiâm mơno tối:

“Idrâp chêng tôu khíu hơ’nêng mơhno tơdroăng ki khíu pâ hiăng lêk lôi. Pôa Nguyễn Phú Trọng, môi ngế Kăn hnê mơhno ki kân rơkê dêi tơnêi têa hiăng lêk lôi, kuăn pơlê ôh tá ai ki klâi teăng rơkong tơpui ngin tŏn chêng kố hơlêm tơdroăng síu khéa, pơ’lâng kơ pôa’’.

A kơpong tơkăng kong tơring Ƀuôn Đôn, kong pơlê Dak Lak, pôa pâ Hoài, kăn ƀuôn Niêng 3, cheăm Ea Ñuôl rơtế ƀă vâi krâ nhŏng o mơngế M’Nông, Rơđế, mơngế Lếo ƀă mâu ƀok phop kuăn pơlê ki tiô khôp Phop a hngêi chuô Long Thọ pro kơƀăng xối ƀă hlối xối khôp pâ kơ mơhúa Kăn xiâm hnê ngăn dêi kuăn pơlê.

“Kăn xiâm pơkuâ hnê ngăn môi tiah ngế pâ, ngế pôa dêi ngin. Ngin mơjo pâ ‘nâng drêng hiăng hlâ lêk lôi. Ngin mơnê kơ pôa Nguyễn Phú Trọng hên pá kâi tối hiăng ăm ngin ai tơdroăng rêh ối tơƀrê tơrŭm môi tuăn dêi rơpó, ‘nâi hơ-ui gum kuăn pơlê ki ối a kơpong xơpá kố’’.