Ai vâ chê 6.000 Khu (ƀă lối 252.000 roh ngế), cho teăng mâ khu râ kăn xiâm pơkuâ hnê ngăn Đảng, Tơnêi têa, mâu khu cheăng, khu xiâm, kơvâ cheăng, rêm râ, kong pơlê, tíu cheăng, mâu khu lêng kuăn pơlê, mâu Khu tơpui kâ ƀă kong têa ê, teăng mâ mâu khu tơrŭm cheăng ƀă pú hmâ lâp plâi tơnêi, kuăn pơlê hiăng troh lăm pôu ngăn, pơtroh rơvĭu reăng, hơlêm rơpŏng pôa Nguyễn Phú Trọng - Kăn xiâm pơkuâ hnê ngăn Đảng.

Tung tuăn tơmiât dêi hên ngế kuăn pơlê drêng tối troh Kăn xiâm pơkuâ hnê ngăn Đảng, tâi tâng vâi pơrá mơhno hiâm mơno nhuô̆m, khéa pâ mơjo môi ngế ai tuăn ngôa rơkê hiâm mơno lĕm tâi tâng, đi đo pleăng tâi ivá tơná ăm tơdroăng mơjiâng ƀă mơnhông tơnêi têa. Hên kuăn pơlê tối, pôa Nguyễn Phú Trọng - Kăn xiâm pơkuâ hnê ngăn Đảng cho môi ngế kăn pơkuâ ki rơkê păng ‘nâng, đi đo pêi tâi ivá tơná, tuăn ngôa rơkê dêi tơná kum ăm tơnêi têa, achê ƀă kuăn pơlê.

Ƀă khu rơxông ối nếo hâi kố, hên ngế tối ăm ‘nâi ƀă mâu tơdroăng veăng gum ƀă pleăng đi đo ăm tơdroăng mơnhông dêi tơnêi têa, pôa Nguyễn Phú Trọng - Kăn xiâm pơkuâ hnê ngăn Đảng đi đo cho um méa djâ troăng ahdrối, cho tơdroăng ki vâ mơhnhôk kân vâ rơxông ối nếo hriâm tâp ƀă pêi tiô. Ƀă mâu tơdroăng pêi ki nhên, rơxông ối nếo hâi kố kal mơ-eăm, pơtâp tiô tơdjâ, hiâm mơno lĕm dêi kăn xiâm pơkuâ hnê ngăn Đảng, chiâng môi ngế kuăn pơlê lĕm, ai hên tơdroăng ki pleăng ăm pơlê pơla.

Đoân viên A Tống Tiến Quân, Khu pơkuâ tơdroăng pêi cheăng, Khu pơkuâ Đoân droh rơtăm Kon Tum tối ăm ‘nâi, khế 7 hơnăm kố, rơtế lâp tơnêi têa lăm ‘mé pôa Nguyễn Phú Trọng - Kăn xiâm pơkuâ hnê ngăn Đảng vêh a tíu pơtê má mơ’nui ƀă tơbâ mâu tơdroăng veăng gum kân kĭn dêi Kăn xiâm pơkuâ hnê ngăn Đảng, ƀă châ tơná thăm ai tơdroăng ki vâ hriâm hên, mơ-eăm hên luâ tâ kơ mê nếo:

“Pôa Nguyễn Phú Trọng - Kăn xiâm pơkuâ hnê ngăn Đảng cho môi um méa kân vâ rơxông ối nếo mơ-eăm chiâng môi ngế đoân viên ki lĕm, tung tơdroăng la ngiâ cho môi ngế đảng viên ai troăng tơmiât pêi la ngiâ, krá châ pêi cheăng gum ăm tơnêi têa. Tơpui leăng ƀă tơmeăm kơnía Pôa chôu ‘măn ăm rơxông ối nếo ngin o kô mơ-eăm, mơnhông tung tơdroăng pêi cheăng dêi tơná’’.

Plâ môi rơxông pôa Nguyễn Phú Trọng - Kăn xiâm pơkuâ hnê ngăn Đảng hiăng hiăng gum kuăn pơlê, xua kuăn pơlê, môi ngế tơmiât pêi, ngế pêi ‘na khôi túa lĕm tro, khu râ kăn pơkuâ, môi ngế ai hiâm mơno lĕm kân kĕng, plâ rơxông rêh ối tiah kuăn pơlê ki ê, tơdrăng ƀă loi tơngah khât. Mơhé pôa Nguyễn Phú Trọng - Kăn xiâm pơkuâ hnê ngăn Đảng hiăng prôk hơngế, laga mâu tơmeăm khoăng ki kơnía dêi Kăn xiâm pơkuâ hnê ngăn Đảng chôu ‘măn ăm kô troh tá ah ối tung hiâm mơno dêi rêm ngế kuăn pơlê Việt Nam ƀă tơdroăng ki nhuô̆m dêi pú hmâ lâp plâi tơnêi.