Rôh hôp kố kal séa ngăn tơkŭm, pơkâ tơleăng mâu tơdroăng cheăng ki u ối kal châ pêi pro klêi tung hơnăm 2024, tơdrêng amê hlối pơkâ tơdroăng cheăng ƀă tơdroăng tơpui kâ dêi Vi ƀan pơkuâ Kuô̆k hô̆i hơnăm 2025 ƀă séa ngăn, pơkâ mâu tơdroăng kal ki ê tiô hnoăng. Tơpui a rôh pơxiâm po hôp, pôa Trần Thanh Mẫn, Kăn xiâm hnê ngăn Kuô̆k hô̆i ăm ‘nâi, tung péa hâi po rôh hôp, Vi ƀan pơkuâ Kuô̆k hô̆i kô tơrŭm séa ngăn tơdroăng cheăng mơgêi, ing mê vâ pêi a hneăng hôp má 8, Kuô̆k hô̆i hneăng 15 ƀă tơdroăng mơjiâng luât séa ngăn tơbleăng tơdroăng dêi Vi ƀan pơkuâ Kuô̆k hô̆i hơnăm 2025, ăm rơkong tơpui ki apoăng ‘na hbrâ rơnáu ăm hneăng hôp má 9 dêi Kuô̆k hô̆i.

Tiah mê, tiô tối hdrối, Kuô̆k hô̆i kô hôp ôh tá tối hdrối mơ’nui khế 2/2025 vâ rơnêu mâu luât ki ai tơdjâk troh tơkŭm kơ koan cheăng môi tiah luât tơkŭm Kuô̆k hô̆i, luât Tơrŭ, Chin phuh, luât tơrŭm khu kăn pơkuâ kong pơlê. Vi ƀan pơkuâ Kuô̆k hô̆i kô ăm rơkong veăng tơpui tung 07 tơdroăng ki kal ‘na liăn ngân. Pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế kal rĕng pêi klêi mâu túa pơkâ, tơdroăng tơkêa ‘mâi pơhlêh mâu luât vâ pơhlêh nếo, xing xoăng tơrŭm kơ koan tơkŭm ‘nâng ‘nâi, pêi cheăng xêt, tơƀrê.