Kơxo hâi lơ 21/8, Vi ƀan Túa lĕm tro - pơlê pơla dêi Kuô̆k hô̆i tơrŭm ƀă Vi ƀan mâu kơ koan ki tơdjâk troh tơkŭm po rôh tối nhên ‘na tơdroăng pêi pro tiô luât pơkâ tŏng kum, luât hbrâ mơdât, pơkeăng ôh tá xê khât, kế kâ ôh tá xê khât. Tối tơbleăng ăm hlo, tơdroăng pơkeăng ôh tá xê khât, pơkeăng ôh tá xêt ƀă kế kâ ki ôh tá xê khât pơtối hlo rơ-iô, mơnhâu ivá kuăn pơlê ƀă kơdroh ki nhoăm dêi kơvâ pơkeăng pơlât.

Sap apoăng hơnăm 2024, troh nôkố, mâu khu Rak ngăn tê mơdró hiăng pơxâu phâk lối 11.600 ngế pro xôi, phâk lối 76 rơtal liăn; krê pơkeăng pơlât, pơkeăng pro ing kơchâi plâi pôm ai 345 rôh, pơxâu lối 29 rơtal liăn, xo tơmeăm ki pro xôi mê kơnâ troh 14 rơtal liăn. Ngế pơkuâ Khu xiâm ngăn pơkeăng pơlât Đào Hồng Lan tối, pơkeăng ôh tá xê khât ƀă kế kâ ôh tá xê khât cho tơdroăng ki rơ-iô o, kal rĕng tơmâng plâ mơdât, pro kơtăng dêi tâi tâng khu cheăng kal kí.

Tung mâu hơnăm hdrối mê hía nah, Chin phuh, mâu khu xiâm, kơvâ cheăng ƀă kong pơlê hiăng tơbleăng hên troăng hơlâ, la xuân ối mâu tơdroăng pro ki pá ‘na luât tơkŭm pêi pro khât.