A rôh tơpui tơno, Péa ngế kăn pơkuâ tối phiu ro hlo tơdroăng mơnhông tơniăn lĕm dêi tơrŭm cheăng Việt Nam – Lếo tung pơla hdrối nah tung tâi tâng mâu kơvâ cheăng, sap ing cheăng kal kí, tơpui kâ, gâk kring - cheăng lêng troh cheăng kâ, túa lĕm tro, hnê hriâm ƀă tơrŭm tung hên kơvâ cheăng.

Tung la ngiâ ah, péa pâ hiăng môi tuăn pơtối thăm mơdêk loi tung cheăng kal kí; rak vế mâu rôh lăm pôu, trâm mâ khu râ kăn xiâm ƀă rêm râ ing mâu ƀâng Đảng, Tơnêi têa, Kuô̆k hô̆i, Hô̆i đong hnê ngăn kuăn pơlê ƀă trâm mâ kuăn pơlê; mơdêk mơdêi tơrŭm cheăng, tối ki rơkê plĕng pơla Hô̆i đong Hdrông kuăn ngo, mâu Vi ƀan ƀă Khu kăn kuô̆k hô̆i péa tơnêi têa tung cheăng mơjiâng luât, séa ngăn ƀă pơkâ mâu tơdroăng ki ai pơxúa tơdjuôm dêi péa tơnêi têa; pơtối môi tuăn dêi rơpó a mâu rôh hôp Kuô̆k hô̆i tung kơpong ƀă a kong têa ê môi tiah AIPA, IPU, APF vâ rak vế ki pơxúa tơdjuôm dêi péa tơnêi têa ƀă tung kơpong.

Péa pâ môi tuăn tơrŭm krá tơkŭm po tơbâ 65 hơnăm mơjiâng tơrŭm cheăng tơpui kâ ƀă 50 hơnăm kĭ tơkêa tơrŭm tơroâ ƀă Tơrŭm pơla Việt Nam – Lếo a hơnăm 2027, tơdjâk khôi hmâ tơrŭm tơroâ, tơrŭm pơla Việt Nam – Lếo troh mâu rơxông kuăn pơlê péa tơnêi têa, malối cho mâu rơxông nếo. Péa tơnêi têa pơtối tơbleăng pêi tơƀrê mâu tơkêa khu râ kăn xiâm ƀă klêi kơ’nâi Hneăng hôp rôh má 48 Vi ƀan tơrŭm Chin phuh Việt Nam – Lếo, djâ pơxúa tơƀrê ăm kuăn pơlê péa tơnêi têa, veăng gum tơbêng tơrŭm cheăng Lếo – Việt Nam đi đo tơniăn lĕm.