Khu râ kăn pơkuâ dế tơkŭm pêi pro hên troăng hbrâ, mơdât tơhnah tơhnâp; hbrâ xúa hnoăng vâ thế pêi tiô xĕn kuăn pơlê vâ kơdroh iâ má môi tro lŭp. Mâu hâi hiăng hluâ, kuăn pơlê cheăm Dà K’Nàng, tơring Dam Rông, kong pơlê Lâm Đồng rêh ối tung tơdroăng ki ôh tá tơniăn xua tơ’lêi tơhnah tơhnâp tơnêi. Pơtối 2 roh tơhnah tơhnâp tơnêi pro 3 ngế hlâ tung mâu hâi lơ 15/7 ƀă 20/7, mơhé hiăng châ khu râ kăn pơkuâ rơnêu, tâp kơƀăng tơbleăng kơpong rơ-iô, laga tơdroăng ki tơ’lêi tơhnah tơhnâp xuân ối ai.

Rơtế ƀă tơring Dam Rông, hên kơpong dêi kong pơlê Lâm Đồng hiăng ai hên tíu tơbleăng tơ’lêi tơhnah tơhnâp tơnêi tung rơnó mêi kố. Tung mê, pơlê kong kơdrâm Đà Lạt ai 61 tíu ƀă pơlê kong kơdrâm Bảo Lộc ai 55 tíu ki rơ-iô. Hdrối kong mêi kân ton hâi tung kơpong kân rơdâ, Vi ƀan hnê ngăn kong pơlê Lâm Đồng đi đo ai hlá mơ-éa hnê mơhno mâu kơ koan, tíu cheăng ƀă Vi ƀan mâu tơring, pơlê kong kơdrâm tơkŭm pêi pro hên troăng vâ rơnêu, hbrâ ví tơnêi tơhnah tơhnâp tơnêi.