Klêi kơ’nâi pơkâ pêi pro ai 1 hơnăm, kong pơlê Lâm Đồng hiăng pêi kêi đeăng tơdroăng rah xo khu kăn pơkuâ cheăng ing râ kong pơlê troh a cheăm bêng. Klêi kơ’nâi ‘mâi pơcháu hnoăng cheăng tro mơngế tro hnoăng, mâu kơ koan cheăng hiăng ối iâ, tung mê khu pơkuâ hnê ngăn ‘na cheăng Đảng kơdroh châ 66,6%, khu hnê ngăn kuăn pơlê kơdroh 61,9%; lâp kong pơlê hiăng tăng rah khu mơngế pro kăn pơkuâ hnê ngăn cheăng Đảng, Khu kăn hnê ngăn Hô̆i đong, Vi ƀan hnê ngăn kuăn pơlê a 124 to cheăm, bêng, kơpong ƀă mơhnhôk lối 730 ngế kăn ƀô̆, mơngế hnê ngăn, mơngế cheăng tơnêi têa a râ cheăm bêng.

Tơdrêng ƀă tơdroăng ‘mâi rah xo, mơjiâng khu pơkuâ hnê ngăn, kong pơlê hiăng thăm mơdêk túa cheăng chêh bro hlá mơ-éa, bro hlá mơ-éa xúa kơxô̆, tơkéa vâ tối chêh bro tung phân mêm, tung măng tâi tâng. Hnoăng cheăng ki tơdah, tiâ mơnhên kuăn pơlê, drêng ai vâi krâ-nhŏng o kal vâ tí tăng êng, săm tơkêng, săm phoăng dêi pó, hnoăng cheăng ki kố mâu kăn xuân pêi pro rơhí rơhó; tơdroăng pơkuâ ngăn, hnoăng cheăng kal kí tơnêi têa-rêh ối pơlê pơla, cheăng kring vế gak ngăn, rak tơniăn tơdroăng rêh ối-cheăng kâ pơtối châ rak mô mơnêi krá tơniăn lĕm.

Mơnhên ngăn ‘na tơdroăng pơkâ pêi pro mê, pôa Y Thanh Hà Niê Kdăm, Ngế cheăng tung tíu xiâm Đảng, Kăn pơkuâ hnê ngăn Đảng ủi kong pơlê Lâm Đồng ai tối nhên, tơdroăng pêi pro tiô túa cheăng ki pơkuâ ngăn 2 râ kố cho hnoăng cheăng ki hiăng rĕng pêi pro tơdrêng, pêi ton la ngiâ; ôh tá xê to vâ châ tơ’lêi hlâu tung mơnhông mê ối cho hnoăng cheăng ki pêi pro ki kơdo mơ-eăm kân khât, krâu, mơdêi, kơhnâ, xuân hnoăng pôu râng ‘na cheăng tơnêi têa dêi môi ngế pro pơkuâ xiâm. Méluâ trối mê, pakĭng mâu tơdroăng ki hiăng châ tơƀrê xuân kal athế vêh tối tơdrăng khât mâu tơdroăng pêi pro ki ối trâm hên xahpá, pơloăng mơnúa, ki ối ‘ro pơkal athế tơmiât i nhên vâ hriăn plĕng, ‘mâi rơnêu vâ pêi pro ilĕm tro tâ tung la ngiâ.

“Pakĭng mâu tơdroăng ki hiăng châ chiâng pêi pro, khu pơkuâ hnê ngăn rêm tơdroăng cheăng hiăng tơniăn laga, xuân tá hâi kâi teăm tŭm têk, tâi tâng hnoăng ki pơkâ pêi pro tơxâng ƀă râ kong pơlê ƀă râ cheăm hiăng pơcháu. Tơdroăng ki tăng rah, ăm pro pơkuâ cheăng dêi kăn ƀô̆ a mâu cheăm bêng xuân tá hâi teăm tơtro, xuân ối ai mâu hnoăng cheăng xuân tá hâi teăm ai mơngế ki tơxâng, tá hâi ai tŭm kuăn mơngế pêi cheăng lơ pro pơkuâ. Ki rơkê plĕng dêi mâu kăn ƀô̆ xuân tá hâi tơdâng, malối a râ cheăm. Môi khu ối ‘ro ‘na tơdroăng cheăng ki xiâm tơná, tơdroăng pêi pro, mơnhên tơleăng tơdroăng cheăng vâ ai troăng hơlâ tơtro, hlâu rơkê xuân tá hâi teăm kâi tơxông hên. Tơdroăng ki tơrŭm, tơdjêp, tơdah xo, pơtroh chiân mâu tơdroăng tung măng, phân mêm dêi mâu kơmăi kơmok xuân tá hâi teăm tơ’lêi, tá hâi rĕng. Mơjiâng tơmeăm tung măng vâ xúa tơdjuôm tung hnoăng pơkuâ hnê ngăn ối hrá. Hngêi trăng, troăng klông ƀă tơdroăng ki xúa mâu tơmeăm ki mơjiâng ăm kuăn pơlê xuân tá hâi teăm châ ai pơxúa to lâi ôh”.

Xông tơpui hnê tối a roh hôp mê, pôa Đỗ Thanh Bình, Ngế cheăng tung Tíu xiâm Đảng, Ngế xiâm ngăn ‘na tơdroăng cheăng kăn ƀô̆ tơnêi têa ai mơnhên tối, kơdeăn khĕn i hiâm mơno ki hbrâ rơnáu, kơdo mơ-eăm pêi pro khŏm kâi chiâng dêi kong pơlê Lâm Đồng tung pơkâ pêi pro tiô túa ki nếo, malối tơdroăng ki mơhnhôk thế khu kăn ƀô̆ lăm pêi cheăng a mâu cheăm, ƀă hnối pêi pro krâu tung xing xoăng hnoăng cheăng, hnoăng pơkuâ ngăn, Laga, kong pơlê xuân ối trâm hên tơdroăng ki pêi tá hâi troh xua tơnêi tíu kân rơdâ má môi lâp tơnêi têa, kuăn pơlê kơdrâm, hên kăn ƀô̆ athế pêi cheăng hơngế dêi ing on veăng, rơpŏng hngêi tung pơla mê, kơxô̆ mơngế ki pêi cheăng ton xŏn la ngiâ bu iâ, kơmăi kơmok, kŏng ngê̆ ƀă troăng hơlâ tŏng gum ăm mâu kăn ƀô̆ tá hâi tơxâng ƀă hnoăng cheăng pêi.

Pôa Đỗ Thanh Bình, Ngế cheăng ngăn ‘na hnoăng cheăng kăn ƀô̆ tơnêi têa tối ăm ngin ‘nâi, tung la ngiâ ah, khu kăn hnê ngăn kong pơlê Lâm Đồng kal athế pơtối séa ngăn, khŏm tăng rah tŭm mơngế pro kăn ƀô̆ ai tŭm mơngế cheăng tung khu pơkuâ ngăn; thăm tăng rah mâu ngế ki rơkê kơhnâ khât pro kăn ƀô̆ lăm cheăng a cheăm; thăm mơdêk tung pơhlêh túa chêh bro hlá moơ-éa, xúa kŏng ngê̆ kơxô̆ chal nếo; thăm pơcháu hnoăng cheăng ki séa mơnhên ngăn đi đo hnoăng cheăng, lăm ngăn ƀă hlê ihiâm mơno, hmâng rơkong tơpui tối, púi pâ dêi kuăn pơlê, khu mơdró kâ, ing mê, pro loăng rêk vâ mơnhên ki lĕm tro ƀă ki tá hâi tro tung hnoăng pêi cheăng dêi Khu pro pơkuâ 2 râ.

“Pá ngiâ ối hên hnoăng cheăng ki hngăm hngo pơkal athế Lâm Đồng pơtối pơhlêh ó rơdêi tâ nếo, ki păng ‘nâng tâ nếo; pơtối mơdêk i hiâm mơno tơrŭm, hbrâ pêi pro, kho khŏm mơ-eăm hên luâ tâ kơ mê nếo tung pơkuâ ngăn, hnê tơdjâ tơdroăng cheăng pêi. Tơkŭm lêi tah lôi mâu tơdroăng ki xahpá tơvâ tơvân, mâu tíu ki ối kreăng vâ mơdêi túa cheăng ki khu pơkuâ hnê ngăn 2 râ pêi cheăng rế hía rế châ tơhluâ, châ tơƀrê hên tâ, tơxâng tro ƀă i hiâm mơno púi vâ kâi châ mơnhông rĕng, krá tơniăn ton tung chal ki nếo. Khu xiâm hnê ngăn ‘na hnoăng cheăng kăn ƀô̆ lâp tơnêi têa kô tơrŭm cheăng krá kâk, teăm tơdrêng, rơtế ƀă kong pơlê vâ lêi tah lôi mâu tơdroăng ki xahpá, tơvâ tơvân vâ gum khu pơkuâ 2 râ kố pêi cheăng châ tơhluâ, tơƀrê, ai pơxúa păng ‘nâng”.