Tiô pơkâ châ tơbleăng, tâi tâng tíu tơkăng dêi 3 tơring Dà Huoai, Dà Teh, Cát Tiên dêi kong pơlê Lâm Đồng, tơ’mot ƀăng chiâng môi tơring  ki nếo xo inâi Dà Huoai. Hdrối mê, kong pơlê Lâm Đồng tơkŭm po tơmâng xo tơdroăng veăng hnê tối, tâi tâng ai lối 96% ngế kuăn pơlê dêi 3 tơring vâ môi tuăn ƀă troăng hơlâ tơ’mot ƀă mê.

Klêi tơ’mot ƀă, tơring Dà Huoai ai tơnêi rơdâ lối 1.448km2, kơxô̆ pơ’leăng mâ mơngế lối 146.000 ngế, tung mê kuăn ngo lối 22%. Tơring Dà Huoai ki nếo pro a pơlê kân Dà Teh, tơring Dà Teh ton nah. Rôh kố, Hô̆i đong kuăn pơlê kong pơlê Lâm Đồng xuân têk kŏng tiâ vâ mơjiâng 5 to cheăm ki nếo ing tơdroăng tơ’mot péa to cheăm chiâng môi.