Kơxo lơ 10/2, Vi ƀan kong pơlê Lâm Đồng hiăng tơkŭm po leh pơxiâm pêi tơdroăng tơkêa bro ‘mâi rơnêu, po rơdâ văng Prenn. Kố cho troăng prôk ki kal tơdjêp ƀă ki rơnâk ing Dầu Giây – Liên Khương, cho hơlâ troăng ki xiâm vâ prôk mot a pơlê kong kơdrâm Đà Lạt. Tơdroăng ‘mâi rơnêu pro, po rơdâ văng Prenn Đà Lạt cho troăng prôk râ má III dêi kong ngo, xŏn 7,4km, yâu pŭn toăng rơxế kơtâu, troăng rơdâ hía 15,5m, ngiâ troăng rơdâ 14,5m, luâ 2 hdroh tâng vâ pơchông ƀă  văng ki nôkố.

Drô troăng ai vê hdró 4 tíu ăm rơxế pơtê ƀă 2 plông. Tơdroăng tơkêa bro ai tâi tâng kơxô̆ liăn ‘no 553 rơtal liăn ing kơxô̆ liăn ngân dêi kong pơlê. Tung pơla pêi tơdroăng tơkêa ai 11 khế, tơkêa vâ tối pê klêi hdrối hâi lơ 31/12/2023. Tơbleăng a leh pơxiâm pro, pôa Trần Văn Hiệp, Kăn xiâm hnê ngăn Vi ƀan kong pơlê Lâm Đồng ăm ‘nâi, tơdroăng ‘no liăn pro văng ngo Prenn cho kal, tơdrêng ƀă pơxúa, tơbrê ‘na mơnhông tơƀrê troăng prôk kong pơlê Lâm Đồng; pơ kâ tơkŭm pro, séa ngăn mơjiâng pro krá, thế tơniăn tung pêi pro ƀă pêi krúa lĕm hyôh kong prâi. Mâu tíu pêi cheăng, kơvâ cheăng dêi kong pơlê veăng kum, pro tơ‘lêi hlâu vâ tơbleăng pêi tơdroăng tơkêa bro tro tiô pơkâ.