Laga, troh tâi khế 10, lâp tung kong pơlê nếo châ xo vâ chê 30% tiô pơkâ. Mâu tơdroăng tơkêa bro ki kân la kơxô̆ liăn ăm xo bú iâ, malối cho péa tơdroăng tơkêa bro troăng kân tơdrăng lĕm Bảo Lộc - Liên Khương ƀă Tân Phú - Bảo Lộc, ƀă tâi tâng tơdroăng pơkâ kơxô̆ liăn lối 5.000 rơtal liăn la hâi teăm châ xo vâ pêi pro. Ki xiâm xua tơvâ tơvân tung tơdroăng chêl thiăn liăn ‘mâi xĕn tơnêi tíu hngêi trăng tơmeăm khoăng, kong hlối mêi hên ƀă ivá pêi cheăng dêi mâu khu ki pơkuâ mơjiâng pro hâi rơkê to lâi.

Hlo tơdroăng hrá châ xo liăn ngân, Vi ƀan kuăn pơlê kong pơlê Lâm Đồng hiăng pơkâ ăm mâu khu ‘no liăn mơjiâng pro mơdêk hnoăng cheăng pêi, ngăn nhên a tíu mơjiâng pro, lăm ngăn, tăng ngăn ƀă hnê khĕn lơ hôu pơxâu mâu ngế pơkuâ mơjiâng pro lơ hrá pêi. Pakĭng mê, Vi ƀan kuăn pơlê mâu cheăm, bêng, kơpong tíu ai tơdroăng tơkêa bro kal tơkŭm mơdêk tĕng chêl thiăn liăn ‘mâi xĕn tíu vâ pro troăng, pêi cheăng tá hâi pơlê, thế rak tơniăn tơdroăng pơcháu  tíu mơjiâng pro lĕm tro vâ pêi pro.

Mâu tíu pêi cheăng, kơvâ cheăng tơdjâk troh xuân châ pơcháu tơrŭm nhên krá, tơleăng mơnhên klêi mâu tơdroăng tơvâ tơvân ‘na yă tơnêi, pro hlá mơ-éa vâ ‘no liăn mơjiâng pro, ƀă tiô pơkâ pái khế tơbleăng tơdroăng mơjiâng pro ăm Vi ƀan Kuăn pơlê dêi kong pơlê.