Troh nôkố, tâi tâng kơxô̆ liăn mơ’no ăm mâu troăng pêi ôm hyô pêt mơjiâng tơmeăm ing chiâk deăng dêi Lâm Đồng dâng 377 rơtal liăn, tung ƀăng deăng lối 300ha. Tung mê, ai 212 ha tơnêi pêi chiâk deăng, 9 ha tơnêi mơjiâng, ki ê cho ƀăng deăng ki ê. Laga, hluâ vâ chê 2 hơnăm Lâm Đồng tơbleăng Pơkâ pơtân ‘na mơ’no liăn cheăng ƀă pơkuâ tơdroăng pêi cheăng ôm hyô pêt mơjiâng tơmeăm ing chiâk deăng tung kong pơlê, hên tơdroăng pá puât, tơvâ tơvân nếo pơtối ai nếo.

Ki nhên, rơtế ƀă 33 tíu ôm hyô pêt mơjiâng tơmeăm pêi lo ing chiâk deăng hiăng châ kong pơlê ăm phêp pêi cheăng pơtân hdrối mê, chât tíu ôm hyô pêt mơjiâng tơmeăm ing chiâk deăng ki nếo xuân trâm hên pá puât, tá hâi ai tơdroăng ki tơdâng, môi tuăn tung po rơdâ pêi pro. Ki má lối cho athế pêi kêi đeăng ‘na tơdroăng pro hlá mơ-éa, rak tơniăn mâu tơdroăng ‘na mơjiâng, pơkâ xúa tơnêi, pơkâ pêi mơjiâng, kơxô̆ tơmeăm ai kế tâp kơpêng tơnêi pêi chiâk deăng, pơ’lêh tơnêi pêi chiâk deăng chiâng tơnêi pêi ki ê.

Tơdroăng ki hiăng chiâng tơdroăng mơdât kân pro mâu tơdroăng tơkêa bro ôm hyô pêt mơjiâng tơmeăm ing chiâk deăng tá hâi chiâng vâ po rơdâ pêi pro mơ’no liăn cheăng, lơ mơ’no liăn cheăng tá hâi tro kơlo, tá hâi tơniăn châ tiô pơkâ vâ tơxâng tơdroăng kal vâ lăm ngăn dêi tơmối ôm hyô.

Tiô jâ Đoàn Ngọc Bích, Kăn pơkuâ Kŏng ti tê rôe tơmeăm ngi kong têa ê Tám Trình, a tơring Lâm Hà, Lâm Đồng, pakĭng mâu tơdroăng pá puât kố, tơdroăng châ ăm phêp ăm tơmối ối a kơpong, tíu ôm hyô pêt mơjiâng tơmeăm ing chiâk deăng xuân châ kong pơlê séa ngăn.

‘’Tíu ôm hyô dêi tíu cheăng tơdjâk troh kơphế. Xiâm kối cho vâ ăm tơmối troh lăm ngăn ‘na tơdroăng pêt mơjiâng kơphế, têng, uâ kơphế gá tiah lâi. Laga xuân dế trâm mâu tơdroăng ‘na hô sơ ‘na luât. Tơdrêng amê, tơmối ôm hyô ngăn tơmeăm pêt mơjiâng tơmeăm ing chiâk deăng mê ôh tá ai tíu ối pơtê, tơmối kong têa ê troh Việt Nam mê vâ ối a pơlê kố vâ vâi ti tăng plĕng. Mê xuân cho môi tung mâu tơdroăng kơ-êng kân dêi tíu ôm hyô ngăn tơdroăng pêt mơjiâng tơmeăm ing chiâk deăng kố’’.

Lâm Đồng cho kong pơlê apoăng dêi lâp tơnêi têa pêi pro mơnúa ôm ngăn ngăn tíu pêt mơjiâng tơmeăm ing chiâk deăng, hlối pêi ôm hyô ƀă pêt mơjiâng tơmeăm ing chiâk deăng. Pôa Phạm S, Kăn phŏ hnê ngăn Vi ƀan kong pơlê Lâm Đồng mơnhên tối, nôkố troăng pêi ôm hyô kố hiăng mơnhông mơdêk rơdêi, tơmeăm ki ai hlâu ƀă ki tơ’lêi hlâu, xúa châ tơƀrê mâu tơmeăm mơjiâng tơmeăm pêi lo ing chiâk deăng kum tung ôm hyô, tăng cheăng pêi, mơdêk pêi lo liăn ƀă tơbleăng tơmeăm pêi lo ing chiâk deăng dêi kong pơlê.

Xua mê, rơtế ƀă thâ ti tăng mâu troăng pêi vâ tah lôi pá puât, tơvâ tơvân, Lâm Đồng xuân kal tơkŭm mơjiâng mâu troăng pơkâ pêi ki nhên vâ thăm mơnhông mơdêk ôm hyô pêt mơjiâng tơmeăm ing chiâk deăng mơnhông tơtêk tơniăn tiô pơkâ dêi luât.

Pôa Phạm S, tối:

‘’Tung pơla kố nah, kong pơlê ai 33 tíu ôm hyô ngăn tíu pêt tơmeăm pêi lo ing chiâk deăng laga kơlo mơ’no liăn, pêi ối kŭn ƀă tơmeăm bô bối pơla mâu troăng pêi. Tung hneăng la ngiâ, kong pơlê ai troăng prôk kơjo, mơhnhôk mâu troăng pêi tung ƀăng deăng kân tâ, tơniăn ƀăng deăng mơ’no liăn mơjiâng mâu kế tơmeăm khoăng, mâu tơmeăm ôh tá bô bối xếo, djâ troăng pêi ki rơkê, tơtro ƀă troăng pêi dêi kơchơ mơdró, kong prâi.

Mâu tíu ki ê ôh tá ai ivá chiâng pêi ôh, Lâm Đồng ai tơ’lêi hlâu tâ mê kô mơhnhôk mơnhông vâ mơjiâng tơmeăm ôm hyô ki phá tơ-ê ƀă mơnhông mơdêk krá tơniăn tung la ngiâ’’.

Mơ’nui hơnăm 2022 pơla kố nah, Khu pơkuâ ‘na mơhno khôi túa lĕm tro, Tơ’noăng ivá ƀă Ôm hyô kong pơlê hiăng tơkŭm po Hneăng hôp mơnhên ƀă pơkâ troăng pêi mơnhông mơdêk pêi cheăng ôm hyô ngăn tơmeăm pêt ing chiâk deăng. Xông tơpui a hneăng hôp, pôa Phạm S tối, tung pơla kố nah, kong pơlê Lâm Đồng cho môi tung mâu kong pơlê ối má môi lâp tơnêi têa ‘na mơnhông mơdêk ôm hyô ngăn tơmeăm pêt mơjiâng ing chiâk deăng, ing mê, hiăng troh lâp lu um ôm hyô, kong kế ƀă khôi túa lĕm tro mơngế Đà Lạt – Lâm Đồng, mơhnhôk kơxô̆ tơmối troh hên, mơjiâng tơ’nôm cheăng pêi ƀă pêi lo liăn ing tơdroăng tê tơmeăm tơdrêng amê.

Laga, tung tơdroăng pêi pro xuân ối trâm hên pá puât, tơvâ tơvân. Pôa Phạm S pơcháu khu, kơvâ cheăng, tơring ki tơdjâk, pơtối séa ngăn mâu tíu ôm hyô ngăn pêt tơmeăm ing chiâk deăng hiăng châ mơnhên, hnê mơhno mâu tíu cheăng tơ’nôm, pêi kêi đeăng mâu pơkâ vâ pơkâ thế ƀă mơnhên troăng pêi ôm hyô pêt mơjiâng ing chiâk deăng.

Tơkŭm tâi tâng rơkong tơpui tối, pơkâ thế dêi kăn teăng mâ tơ’nôm, pêi kêi đeăng mâu tơdroăng xiâm, túa pơkâ pêi ƀă tối tơbleăng Vi ƀan kuăn pơlê kong pơlê séa ngăn, tơ’nôm, ‘mâi rơnêu troăng pơkâ pêi tơtro ƀă tơdroăng nôkố, vâ pơtối mơnhông tơmeăm ki ai hlâu, ki rơdêi nôkố, mơnhông mơdêk ôm hyô pêt tơmeăm ing chiâk deăng tiô tro troăng pơkâ pêi hiăng pơkâ mơ’no.