Sap ing hdrối Têt Lo hơnăm nếo troh nôkố, kơpong kong loăng hngó tơ’lêi chếo a tiêuh khu 263 ối tung cheăm Phúc Thọ, tơring Lâm Hà, Lâm Đồng đi đo châ Khu pơkuâ kong tât khía Lâm Hà ƀă mâu rơpŏng tơdah gak ngăn kong thăm pêi pro tơdroăng séa ngăn, pơkuâ, xing xoăng mơngế gâk đi đo vâ châ hlo teăm tơdrêng tâng ai on chếo kong.

Tiô pôa Dương Thanh Quang, Kăn pơkuâ khu pơkuâ cheăng kơxô̆ 5, ối tung Khu pơkuâ gâk ngăn kong rak kơnhŏng têa Lâm Hà, sap apoăng rơnó khăng khoăng, kăn ƀô̆ tiêuh khu hiăng tơkŭm khu mơngế po văng nhâ pêi, chiâ troăng mơdât on chếo ƀă pro rơkôp vâ gâk ngăn hbrâ mơdât on chếo kong.

‘’Nhŏng o ngin xing xoăng hnoăng cheăng, vêh séa ngăn khu tơdah gâk ngăn kong vâ mơjiâng pơkâ pêi cheăng plâ hâi plâ măng. Tơdrêng amê pơtroh mơngế vâ tŏng kum a mâu tíu ki ai khu ‘mêi tong ko loăng rơtế nhŏng o lăm séa ngăn plâ hâi plâ măng’’.

Lâm Hà ai lối 34.000 ha kong, ki hên cho ƀăng kong pêt achê dêi pó, tơkăng ƀă chiâk deăng pêt mơjiâng tơmeăm dêi kuăn pơlê xua mê tơ’lêi on chếo a kơlo ki râ. Pôa Hồ Nghĩa Nam, Kăn phŏ pơkuâ kong rak kơnhŏng têa Lâm Hà tối ăm ‘nâi, rơtế ƀă thăm séa ngăn, tơdroăng mơjiâng ƀă pêi pro tơdâng tơ’mô mâu troăng hbrâ mơdât on chếo kong dế châ mâu tíu cheăng tơtrŏng pêi pro.

‘’Khu pơkuâ kong hiăng rơnêu mâu rơkôp gâk ngăn on ƀă rôe mâu tơmeăm vâ kum tung tơdroăng hbrâ mơdât on chếo, tơpâ on chếo. Nôkố, mâu khu pêi cheăng dế pêi kêi đeăng mâu tơmeăm, tơniăn tung hơnăm 2023 ôh tá ăm ai tơdroăng chếo kong’’.

Lâm Đồng cho kong pơlê ai hên ƀăng kong loăng hngó ƀă mâu kong pêt tơ’lêi chếo, ƀă tâi tâng ƀăng deăng lối 513.000 ha. Nếo apoăng rơnó tô laga kong pơlê hiăng ai 3 rơnó chếo pá kơdâm kong. Kơnôm rĕng châ hlo ƀă tơpâ on teăm tơdrêng xua mê ôh tá tro lŭp ‘na kong. Nôkố kong prâi a Lâm Đồng khăng khoăng, kong tô, tơ’lêi chếo kong a kơlo ki râ. Vi ƀan kong pơlê Lâm Đồng hiăng tơbleăng hên hlá mơ-éa mơhnhôk, hnê mơhno mâu kơ koan, tíu cheăng ôh tá chiâng tơngôu, tơkŭm pêi pro tơdâng tơ’mô hên troăng pêi hbrâ mơdât on chếo.