Tung rôh po mơdĭng, hên mâu tơdroăng cheăng pêi pro lâp plâi tơnêi kô châ tơkŭm po môi tiah: Mơđah tơbleăng tơmeăm chế ƀă kong ngê̆ uâ pơliê pro chế ki lĕm tiô chal nôkố; Rôh hôp kố tơpui tơno ‘na tơdroăng tung la ngiâ mơdêk inâi chế Việt Nam; mơđah tơbleăng chế tơrŭm tơroâ ƀă kăn teăng mâ ƀă tơmối lâp plâi tơnêi; Hâi po mơdĭng troăng phô̆ ƀă túa lĕm tro ‘na chế; Troăng prôk ôm hyô kong kế nhâ loăng kơpong pêt chế; rơtế ƀă mâu tơdroăng ngê̆ thuât, mơđah tơbleăng ƀă ngăn ôu mâu chế.

Pakĭng mê, ối ai mâu tơdroăng cheăng tơkŭm po pa gong ki xiâm môi tiah: Tơnêi tơníu ngê̆ thuât Chế Việt, mơđah tơbleăng mâu tơdroăng ki chêh pro xo tơdroăng ki rơkê sap ing chế; Rôh tơ’noăng “Gen Chế” ăm sinh viên mâu hngêi trung đăi hok, mơhnhôk tơdroăng ki tơmiêt pêi rơkê ƀă pơxiâm pêi cheăng sap ing chế ƀă hên ki ê.

Po mơdĭng Chế Lâp plâi tơnêi 2025 tơngah chiâng tơdroăng ki xiâm túa lĕm tro – ôm hyô-cheăng kâ tơxâng ƀă kong têa ê dêi Lâm Đồng ƀă Việt Nam, po troăng nếo ăm Chế Việt Nam châ troh tung lâp plâi tơnêi.