Rơtế ƀă tơdroăng ki pơtê pơtân xúa mâu túa vaccine pâk hbrâ mơdât pơreăng a ro vâ séa ngăn, mơnhên xiâm kối ro xo têa to tro châi klêa, Vi ƀan hnê ngăn kong pơlê Lâm Đồng pơkâ thế Khu ngăn Chiâk deăng ƀă Mơnhông thôn pơlê, Vi ƀan mâu tơring Đơn Dương ƀă Đức Trọng xoăng mâu khu ki cheăng pơlât mơnăn troh rêm rơpŏng kuăn pơlê ki ai í peâp tro pơreăng vâ hnê mơhno pêi pro mâu troăng hơlâ hbrâ mơdât pơreăng.

Malối, séa ngăn krá mâu hnoăng hnoăng cheăng séa ngăn pơreăng xâ chêh, pôi tá ăm ai tơdroăng ki tê, chơ mâu mơnăn ki tro pơreăng lơ châ chêh mâu í peâp tro pơreăng tung kơpong ki ai pơreăng; hbrâ mơdât krá tơniăn tơdroăng ki pơto chơ í peâp lo ing cheăm, tơring, kong pơlê malối cho ƀă mâu ro xo têa ki mơni tro pơreăng.

Môi tiah Rơ’jíu Việt Nam hiăng tơbleăng, lối rơpâu to ro xo têa tôu a 2 tơring Đơn Dương ƀă Đức Trọng dêi kong pơlê Lâm Đồng châi klêa lo mơheăm kơtong hlâ. Riân troh hâi lơ 9/8, kơ koan ki ai tơdjâk hiăng ‘nâi ai lối 3.700 to ro xo têa tôu tro pơreăng châi klêa ƀă lối 100 to ro xo têa tôu hlâ.