Hơnăm 2022, tâi tâng pơkâ pêi mơ’no liăn cheăng tơnêi têa dêi kong pơlê Lâm Đồng châ xing xoăng vâ chê 6.500 rơtal liăn, vâ mơjiâng pro 350 tơdroăng tơkêa bro.Tung mê, ai 722 rơtal liăn cho kơxô̆ liăn ton xŏn sap hơnăm 2021 pơtroh ăm.

Tiô pôa Bùi Sơn Điền, Kăn pơkuâ Khu pơkâ túa cheăng ƀă Mơ’no liăn cheăng kong pơlê Lâm Đồng, riân troh hâi lơ 15/11, pơkâ pêi kơxô̆ liăn mơ’no cheăng tơnêi têa hơnăm 2022 dêi kong pơlê bu nếo mơ’no châ 3.694 rơtal liăn, châ 68,5% pơkâ pêi. Chiâng ai tơdroăng mơ’no liăn hrá xua trâm hên pá puât, tơvâ tơvân tung tăng tơnêi ƀă mâu tơdroăng pro mơ-éa.

Nôkố tíu cheăng dế tơrŭm ƀă mâu kơ koan cheăng dêi kong pơlê mơhnhôk mâu khu mơ’no liăn cheăng rĕng tung tơdroăng pêi cheăng mơjiâng pro. Mơ-eăm troh hâi lơ 31/12 la ngiâ châ kơxô̆ liăn mơ’no cheăng lối 95% ƀă troh tâi pái khế apoăng hơnăm 2023 châ 100% pơkâ pêi.

‘’Ngin xuân hiăng pêi cheăng ƀă rêm khu mơ’no liăn cheăng, ƀă mâu kong pơlê mê cho trâm hên pá puât. Laga, tiô tơdroăng tối hdrối ƀă tơkêa dêi mâu khu mơ’no liăn cheăng mê tâi tâng mê cho kô mơ’no liăn cheăng tiô tơdroăng pêi cheăng mơjiâng pro. Kơxô̆ liăn ki u ối cho hên tơdrêng amê hâi khế pêi pro bu u ối 1 khế nếo tê, xua mê, ngin xuân hiăng pêi cheăng, tơpui phôn mơhnhôk, pơchân tối.

Krê mâu tơdroăng tơkêa bro ki mơni kô ton tơrôu tơdroăng mơjiâng pro mê xuân hiăng ai tơbleăng ƀă Viƀan kong pơlê’’.

Tơtrŏng má môi, mâu tơdroăng tơkêa bro ai kơxô̆ liăn mơ’no hrá cho mâu tơmeăm xua mâu khu, kơvâ cheăng dêi kong pơlê pro khu mơ’no liăn cheăng. Ki nhên, Khu pơkuâ tơdroăng kal tiô troăng rơ’jíu, um tơvi ƀă internet châ xing xoăng 22 rơtal liăn laga bu nếo mơ’no châ 28%, Khu pơkuâ ‘na pêi chiâk deăng ƀă mơnhông thôn pơlê xing xoăng 224 rơtal liăn nếo pêi pro mơ’no liăn châ 23%, Hngêi pơkeăng kân kong pơlê châ xing xoăng 12 rơtal liăn laga xuân bu nếo mơ’no châ 11% ƀă hiá hé.

Drêng ai tơdroăng kơxô̆ liăn mơ’no cheăng tơnêi têa tung kong pơlê mơ’no cho hrá, pôa Trần Văn Hiệp, Kăn hnê ngăn Vi ƀan kong pơlê Lâm Đồng tối ăm ‘nâi kô khŏm mơ-eăm pơxâu phak ‘na hnoăng ƀă mâu khu pơkuâ mơ’no liăn cheăng tâng ôh tá tơniăn mơ’no liăn pêi cheăng tiô tro pơkâ.

‘’Mơ’no liăn cheăng tơnêi têa dêi kong pơlê ối hên tơdroăng tá hâi tro, hrá tung tơdroăng chêl thiê̆n liăn tăng tơnêi, mâu tơmeăm ki tro mê cho thế hiăng mơjiâng pro laga nôkố xuân tá hâi pêi pro. Tung mê, tơdroăng mơ’no liăn cheăng dêi mâu kơvâ cheăng ối kreăng hên, kal xo vế túa ki rơkê tơtro ƀă ôh tá chiâng ăm ai tơdroăng tiah mê nếo.

Troăng tơmiât cho mơnhên troh mơ’nui hơnăm, khu cheăng ki lâi ôh tá mơ’no liăn cheăng mê pơkâ thế tơvêh kơxô̆ liăn ƀă ôh tá ăm xếo, môi tuăn ƀă tơmeăm tá hâi mơjiâng pro kêi. Ƀă pôu râng hnoăng cheăng mê cho kăn hnê ngăn ƀă Kăn pơkuâ mâu khu cheăng, kơvâ cheăng’’.