Tung tơdroăng ki krip ro, Ngế kuăn rơtăm pơtáu ƀă kơdrâi pôa hiăng tơdah pôa Phạm Minh Chính, Ngế pro xiâm hnê ngăn tơnêi têa pin ƀă kơdrâi pôa to a tíu ki a’ngêi, pá kơdâm 2 hlá cơ dêi 2 tơnêi têa, um méa Việt Nam ƀă Brunei xuân hiăng châ tơbleăng. Klêi mê, pôa Al - Muhtadee Billah hiăng krếo thế pôa Phạm Minh Chính mơnhên ngăn khu lêng ki prôk mơđah pá ngiâ. Klêi kơ’nâi leh koh tơdah, pôa Phạm Minh Chính hiăng lăm pôu, tơpui tơno ƀă mâu kăn ƀô̆, mâu ngế cheăng tung khu kăn teăng mâ ƀă pơlê pơla mơngế Việt Nam a Brunei.

Tung mâu tơdroăng cheăng tung hâi lơ 11/2, Ngế pro xiâm hnê ngăn hiăng lăm pôu ngăn hngêi trung đăi hok tơnêi têa Brunei, trâm tơpui tơno ƀă pơtáu, kơdrâi pơtáu ƀă mâu rơpŏng hngêi dêi pơtáu; tơpui tơno ton, mơnhên, trâu ƀă pơtáu, ngăn leh kĭ tơkêa ‘na mâu tơdroăng cheăng ki tơhrâ mâu tơdroăng cheăng; êng tiâ ƀă khu mơdró kâ ki pêi mơjiâng on tơhrik, klêi mê, tơdroăng hrik têa châu têa kơxăng ki kân má môi dêi kong têa Brunei ƀă hên hĕng mâu tơdroăng ki ê.

Kố cho hneăng lăm pôu ki apoăng dêi pôa Phạm Minh Chính troh a Brunei tiô kơ tơdroăng ki pêi hnoăng cheăng nếo pơtối pơkâ, pêi pro tiô troăng hơlâ tơrŭm cheăng ki hiăng pơkâ tung Hneăng hôp kân Đảng roh má 13 mơ’no thế. Mê cho kơjo mơnhông tơrŭm ƀă mâu kong têa ki achê ƀă ASEAN. Kố xuân cho hneăng lăm pôu ki apoăng dêi Ngế pro xiâm hnê ngăn Chin phuh troh a Brunei klêi kơ’nâi vâ chê 16 hơnăm.