Pôa Nguyễn Văn Nên, Kăn pơkuâ hnê ngăn Đảng Pơlê kong kân Hồ Chí Minh ƀă mâu kăn xiâm dêi Đảng, Tơnêi têa, mâu kăn hnê ngăn a Pơlê kong kân Hồ Chí Mimh, mâu lêng tơplâ, mâu kơvâ cheăng, khu râ, mâu khu tơrŭm cheăng pơlê pơla, khu kăn tơpui kâ dêi mâu kong têa a Pơlê  kong kân, khu kăn mâu kong pơlê, pơlê kong kơdrâm peăng hdroh rơtế hên mâu khu râ kuăn pơlê hiăng lăm pôu ngăn pôa Nguyễn Phú Trọng - Kăn xiâm pơkuâ hnê ngăn Đảng ƀă tuăn tơmiât mơjo pâ kơ pôa.

Pôa Nguyễn Văn Nên chêh a hlá mơ-éa mơdâm tiah kố: “Ngin đi đo pâ môi tiah hlo um méa môi ngế ki lĕm têm rơpiât, ôh tá pơkrip, ‘nâi mơ-eăm  ing ivá rơdêi; môi ngế ai hiâm mơno lĕm, môi ngế kăn ƀô̆ đảng viên ki mơhno troăng lĕm ahdrối, khên tơnôu, ôh tá xâu ki klâi; môi ngế ai hiâm mơno lĕm ‘nâi hơ-ui pâ, ngế rơkê; môi ngế ki djâ troăng lĕm kơhnâ tung hriâm, rơnêu pât tiô troăng rơhlâ tuăn mơno, túa pêi cheăng dêi Pôa Hồ ki pâ mơjo. Khŏm hriâm, trối pôa ƀă mâu pâ pôa, tơhrâ kô pơtối pêi pro tro tơxâng, tơrŭm môi tuăn dêi rơpó khât tâ nếo, mơ-eăm hên tâ mê nếo, mơ-eăm mơnhông Pơlê kong kân Hồ Chí Minh ‘’eăng bâ inâi mêa” môi tiah pôa hiăng púi vâ, rơkong tơpui hnê mơhno, veăng rơtế ƀă lâp tơnêi têa, xua lâp tơnêi têa mơjiâng ƀă kring vế Tơnêi têa Việt Nam rế ton rế rơkê plĕng hơniâp ro, kro mơdrŏng. Pơtroh rơkong hơlêm sí khéa ƀă rơpŏng hngêi pôa Nguyễn Phú Trọng.