Kơmăng lơ 14/12, a Hngêi hơdruê kân Hà Nội, Hngêi hơdruê ai pro pơro Việt Nam hiăng tơkŭm po kân krip leh tơbâ 70 hơnăm mơjiâng (12/1952 – 12/2022) ƀă phiu ro veăng tơdah Mê dái pêi cheăng ối má pái. Pôa Nguyễn Xuân Phúc, Kăn xiâm hnê ngăn tơnêi têa hiăng troh veăng ƀă tơdjuôm phiu ro khu pú hên mâu ngê̆ sih, diên viên dêi hngêi hơdruê. A leh tơbâ, pôa Nguyễn Xuân Phúc diâp Mê dái pêi cheăng ối má pái diâp ăm khu pú hên hngêi hơdruê ƀă ngế krê Ngê̆ sih Ưu tŭ Nguyễn Xuân Bắc.

Klăng roh kố, hngêi hơdruê hiăng ai tơdroăng ngê̆ thuât ki má môi khế 12, mơđah tơbleăng mâu ƀai mơđah tơbleăng tung tơdroăng pro pơro achê kố, tá mâu ƀai mơđah tơbleăng hơdruê ai pro pơro: Đêm trắng, Kiều, Bệnh sĩ, Bão tố Trường Sơn, Điều còn lại, Người trong cõi nhớ, Người tốt nhà số 5, Người yêu Hoa hậu.

Kố cho tơdroăng hơdruê ai pro pơro tối mâu tơdroăng ki phá tơ-ê dê pó tung tơdroăng mơnhông mơdêk tơnêi têa, tơplâ kăch măng troh drêng tí tăng mâu tơdroăng ki tô, ai djâ tơdroăng kal dêi tơdroăng rêh ối  nôkố, mơnhên tơdroăng ki pơ’lêh dêi tơná châ tơƀrê tung hneăng nếo dêi hngêi hơdruê.