Pôa Đỗ Như Ý, a pơlê kong kân Hà Nội cho môi tung rơpâu ngế tơmối châ troh ngăn tŭm tâi tâng Leh tơbleăng kơphế Ƀuôn Ma Thuột roh má 8. Ƀă pôa, Lêh tơbleăng kơphế roh kố mơhno ‘măn ăm tơdroăng ki lĕm tro tung rêm tơdroăng tơkŭm po. Pôa xuân tâ hâk phiu ro ƀă kơphế Ƀuôn Ma Thuột cho tơdroăng ki rơtế loăng pơlái kong kế kong prâi, kuăn mơngế ƀă khôi túa lĕm tro dêi kơpong tơnêi:

“Á hiăng veăng leh tơbleăng kơphế Ƀuôn Ma Thuột sap ing tơkŭm po vêh pơtâp hơdruê xuâng, troh leh tơbleăng troăng kơphô̆, kơmăng hơdruê xuăng, leh tơbleăng on. Á hiăng ôu kơphế a troăng Phan Đình Giót... Á hlo leh tơbleăng hơnăm kố cho kân krip, cho phiu ro ‘nâng, kong prâi lĕm ro, kuăn mơngế lĕm, kơphế xú lĕm ƀă pêng păm Tây Nguyên khên tơnôu, ó rơdêi’’.

Drêng tơmối ing hơngế ôh tá kâi piu 5 hâi leh tơbleăng pêng păm tơdroăng hơdruê xuâng, pro on bâ eăng lĕm mơnâ mâ ngăn, hên mơngiơk lĕm ƀă hiâm mơno hâk vâ tơmối dêi tíu pêi kơphế, mê ngế tơkŭm po leh tơbleăng ƀă mâu tơdroăng hâk vâ a lâp mâu tơring, pơlê kong krâm tung kong pơlê, xuân dế tâ ki u ối.

Pôa Hồ Sỹ Trung, pơkuâ tíu pêt mơjiâng kơphế V’Ori, tơring Krông Păč, kong pơlê Dak Lak tối ăm ‘nâi, kố cho roh apoăng rơtế mâu kơbong cheăng a tơring tơkŭm po tơdroăng hâk vâ ƀă Leh tơbleăng kơphế Ƀuôn Ma Thuột roh má 8, laga hiăng mơjiâng mâu tơdroăng ôh tá kâi piu. Kơmăi hơ’lâk kơphế ‘măn a Tíu chôu ‘măn tơmeăm ton nah tơnêi têa tíu mơdró kơphế CADA hiăng pêi cheăng tâi ivá vâ kum ăm tơmối lăm ngăn kơpong kơphế rĕng má môi a Việt Nam, lăm ngăn tơdroăng vêh mơhno xiâm rêi kơphế lối 100 hơnăm dêi kơpong tơnêi kố.

Pôa Hồ Sỹ Trung pói tơngah, mâu hâi leh tơbleăng pơla kố nah ôh tá xê to rak mâu tơdroăng ki lĕm tro mê ối tơ’nôm tơdroăng hâk vâ ƀă kơphế, mơhnhôk tơ’nôm rơxông ối nếo tơdjuôm ivá mơnhông mơdêk kơvâ, mơjiâng khôi túa lĕm kơphế ăm Dak Lak:

“Hâi ki lâi xuân kơdrâm cho phiu ro klêi kơ’nâi châ hlo video farm (um quay troăng pêi kơdrum kơphế’’ klêi mê ôu kơphế lăm ngăn tơdroăng uâ mơdiê hơ’lâk kơphế a troăng kơphế Việt Nam ƀă mâu pú hmâ hơnăm ối nếo ối troh tíu chôu ‘măn kơphế ƀă ‘nâi ki kơnâ dêi tíu mơdró kơphế CADA xiâm kối kơphế Việt Nam troh lâp lu tơdroăng ki mê troh tâi tâng mâu pú hmâ hơnăm ối nếo vâ kô chiâng tơ’nôm môi troăng pêi cheăng ton xŏn’’.

Tung kơdrâm mơngế troh ƀă Leh tơbleăng kơphế Ƀuôn Ma Thuột roh má 8, pôa Nguyễn Văn Lạng, Kăn hnê ngăn Vi ƀan kong pơlê Dak Lak hneăng hdrối, cho ngế mơnhên dêi tŭm 8 leh tơbleăng kơphế. Cho môi tung mâu ngế djâ tơkŭm po Leh tơbleăng kơphế ki apoăng nah, pôa Nguyễn Văn Lạng mơnhên tối, troh roh má 8 châ tơkŭm po, Dak Lak ôh tá xê to châ troh tơdroăng tơkŭm po leh tơbleăng kân tâ; hên tơmeăm tâ, rơkê tâ, mê ối ai trâu hơngế tâ pơlê pơla hlo nhên tâ ƀă loi tơngah tâ.

“Leh tơbleăng kố ôh tá xê tơdjêp to mâu tơdroăng ki kal dêi kơvâ kơphế mê ối tơdjêp mâu tơdroăng ki ê mơhno ki rơdêi dêi Dak Lak vâi troh a kố hlo tơdroăng ki mê cho pơlê kong kơdrâm dêi kơphế kuăn pơlê kơbố xuân ai kơphế kơbố xuân chiâng ngế ki rơkê tơbleăng tối ‘na kơphế mê cho pơlê pơla rơtế veăng vâi hâk tơbleăng ƀă tơmối ƀă lâp plâi tơnêi’’.

Xuân cho ngế ki hiăng châ hlo tŭm 8 hneăng leh tơbleăng, tơdrêng amê ai tơrŭm trâu hơngế ƀă pơlê pơla kơphế Việt Nam, tiê̆n sih Trịnh Đức Minh, Kăn hnê ngăn Khu pêi kơphế Ƀuôn Ma Thuột tối, Leh tơbleăng roh má 8 hiăng tơtrŏng troh mâu tơdroăng dêi khôi túa lĕm tro kơphế, drêng ai chât workshop ƀă talkshow tung tơdroăng kal. Tiê̆n sih Minh mơnhên, leh tơbleăng roh kố nếo châ tơƀrê tơbleăng tơdroăng châ tơƀrê dêi kơvâ Kơphế ƀă khôi túa lĕm tro Tây Nguyên, rế châ tơƀrê mơnhên troăng prôk vâ cho mâu ngế pêi cheăng dêi leh tơbleăng ai mâu troăng prôk tơxâng tung mơnhông mơdêk kơvâ ƀă tơ’nôm khôi túa lĕm tro ‘na kơphế tung la ngiâ:

“Leh tơbleăng kố mơhno ăm kuăn pơlê hlo hên tơdroăng ki kân rơdâ dêi khôi túa lĕm kơphế. Pơtih môi tiah a workshop, pơtih môi tiah môi roh tơpui tơno kŭn tơbleăng kế ki hơ’lâk ƀă drêng kơphế. Lơ tơpui ‘na ôu kơphế phin mê mơnhên môi tiah lâi. Leh tơbleăng chôa ‘lâng kum mơngế rôe xúa hlê plĕng ki kơnâ păng ‘nâng dêi kơphế ƀă pro tơ’nôm ăm kơphế vâ pro ôm hyô’’.

Leh tơbleăng kơphế Ƀuôn Ma Thuột roh má 8 tơkŭm po tung hên tơdroăng tơ’lêi, ƀă yă kơphế châ kơlo hên ƀă tơniăn rơtế ƀă mâu hnôu kơphế dêi Dak Lak xuân ối pêng, ƀă tŭm 5 hâi dêi leh tơbleăng kong prâi rơngiâp lĕm, ƀă mâu tơdroăng tơkêa bro kân dêi Ƀuôn Ma Thuột dế hiăng vâ vêh troh.

Pôa Trần Đức Nhật, Kăn phŏ hnê ngăn Vi ƀan pơlê kong kơdrâm Ƀuôn Ma Thuột tối ăm ‘nâi, pơlê kong kơdrâm xuân tung hơnăm apoăng pêi pro troăng pơkâ pêi ki phá tơ-ê hiăng châ Kuô̆k hô̆i kĭ, dế hriăn plĕng mơjiâng tơdroăng tơkêa bro mơjiâng Ƀuôn Ma Thuột chiâng pơlê kong kơdrâm kơphế dêi lâp plâi tơnêi... Xua mê, châ tơƀrê dêi Leh tơbleăng kơphế roh má 8 ai kơnâ khât tung hneăng la ngiâ:

“Tơkŭm po châ tơƀrê leh tơbleăng kơphế Ƀuôn Ma Thuột roh má 8 kố cho tơdroăng ki apoăng vâ pin pêi kêi đeăng tơ’nôm tung đê cương mơjiâng inâi Ƀuôn Ma Thuột chiâng pơlê kong kơdrâm dêi lâp plâi tơnêi, mơnhên chiâng plâi cho ki xiâm cho hnoăng cheăng ki xiâm ki pơlê kong kơdrâm Ƀuôn Ma Thuột thế pêi pro tung la ngiâ. Pói tơngah Ƀuôn Ma Thuột chôa ‘lâng kô cho môi tíu troh drêng tối troh Ƀuôn Ma Thuột dêi Việt Nam cho tối troh môi pơlê kong kơdrâm kơphế dêi lâp plâi tơnêi’’.

Lối 100 hơnăm xiâm loăng kơphế mơnhông mơdêk a Dak Lak, vâ chê 20 hơnăm leh tơbleăng kơphế Ƀuôn Ma Thuột châ tơkŭm po, xiâm loăng kơphế hiăng mot trâu tung tơdroăng rêh ối ƀă khôi túa lĕm dêi mâu hdroâng mơngế tung kong pơlê, troh lâp lu Tây Nguyên ƀă lâp tơnêi têa. Rơtế ƀă leh tơbleăng kơphế 2 hơnăm 1 xôh, Dak Lak - Ƀuôn Ma Thuột ối chiâng tíu xiâm tơkŭm po mâu roh tơ’noăng kơphế Việt Nam, djâ kơphế ki xú lĕm dêi Việt Nam troh lâp plâi tơnêi; hiăng mơjiâng châ tơƀrê hlá loăng kơphế lĕm mơnâ mâ ngăn ƀă châ kơnâ tung cheăng kâ.

Pakĭng mê, Leh tơbleăng chêng koăng, leh ro rơnó hơngui mâu hdroâng kuăn ngo Tây Bắc, Đông Bắc, Leh ro rơnó hơngui Quan họ Bắc Ninh xuân rế hía rế rơtế a kơpong tơnêi kố. Kơpong kơdrum mơhno khôi túa lĕm tro drêh ngiât lĕm, ai hên cho tơdroăng cheăng kâ – khôi túa lĕm kơphế, dế mơjiâng mơnhông djâ Dak Lak xông chôa ‘lâng troh pơkâ pêi kân dêi tơná: mơjiâng Ƀuôn Ma Thuột chiâng tíu troh dêi kơphế lâp plâi tơnêi.