Hô̆i đong Hnê ngăn kong pơlê Khánh Hòa nếo môi tuăn troăng hơlâ pêi pro ƀă tơhrâ xoăng liăn ăm kong pơlê veăng pêi pro tơdroăng tơkêa pro troăng tơkoh kơpong tơdjêp 3 to kong pơlê Khánh Hòa, Ninh Thuận ƀă Lâm Đồng. Tiah mê, kong pơlê Khánh Hòa tơhrâ xoăng 930 rơtal liăn tung tâi tâng kơxô̆ liăn vâ chê 1930 rơtal liăn vâ ‘no liăn pro troăng kố, ki u ối cho xua Tơnêi têa ‘no. Kố cho troăng prôk tơkoh kơpong pơla 3 to kong pơlê: Khánh Hòa, Ninh Thuận ƀă Lâm Đồng.

Tơdroăng tơkêa kố ối tung mâu tơdroăng tơkêa ki kal dêi tơnêi têa, ai tâi tâng kơlo liăn ‘no dâng 1.930  rơtal liăn. Troăng tơkoh kơpong tơdjêp mâu kong pơlê Khánh Hòa, Ninh Thuận ƀă Lâm Đồng ai hnoăng cheăng kal khât drêng pro chiâng troăng prôk nếo tung tơdroăng mơnhông mơdêk cheăng kâ rêh ối pơlê pơla tung tâi tâng, kum bro tơniăn tơrŭm kơpong ƀă mâu tơring kong ngo dêi kong pơlê Ninh Thuận, Lâm Đồng, pro tơ’lêi hlâu mơdêi mâu túa pơkâ tơplâ, rak vế tơniăn cheăm bêng, gâk kring a kơpong peăng mâ hâi lu kong pơlê Khánh Hòa.