Khu mơhnhôk ‘na chiâk deăng tung kuăn pơlê rơtế ƀă kuăn pơlê tơdjêp pêi chiâng tê mơdró  ƀă khu mơdró. Kố cho tơdroăng ki châ Khu xiâm ngăn ‘na Chiâk deăng ƀă Mơnhông thôn pơlê tối a “Hneăng hôp tối mơgêi 2 hơnăm tơbleăng tơdroăng Tơkêa bro mơnhông pêi tơƀrê mâu tơdroăng cheăng mơhnhôk pêi chiâk ing tơdroăng ‘mâi pêi tâi tâng tôh mơhnhôk pêi chiâk deăng tung kuăn pơlê” châ tơkŭm po a hâi lơ 2/8, a pơlê kong kơdrâm Plei Ku- kong pơlê Gia Lai.

Pơla 2 hơnăm, chêh ‘mot tung kơmăi lối 5.000 tôh mơhnhôk pêi cheăng tung kuăn pơlê hiăng tơrŭm po hrĭng to lâm hriâm mơnhông kơpong pêt tơmeăm, rơtế pêi 14 tơdroăng tơkêa bro mơhnhôk pêi chiâk. Ing mê, mơnhông kơpong pêt tơmeăm tơniăn krúa tê ăm kong têa ê ăm 500 ha báu, 300 ha loăng plâi kâ, 150 ha kơphế a hên kong pơlê, pơlê kong kân.

Xuân tung 2 hơnăm hdrối, mâu ngế mơhnhôk pêi chiâk tung kuăn pơlê hiăng tơkŭm po 46 rôh tơrŭm tê tơmeăm dêi 2.100 ngế kuăn pơlê kơpong mơdâ pêt hên báu; kum tơrŭm pêi pêt, tê báu plâi a mâu kong pơlê kơpong Tơdế tơnêi têa.