Cho kơphô̆ ki ai hên kơ koan, tíu pêi cheăng dêi Dak Lak la a pơlê kong kơdrâm Ƀuôn Ma Thuột, kơxô̆ rơxế tu tuh kơto a troăng xuân ai troh lối rơpâu toăng, malối cho a mâu cheăm kơpong pa kĭng. Pôa Y Thơm Kênh, thôn 1, cheăm Čư̆ Êbur, pơlê kong kơdrâm Ƀuôn Ma Thuột ăm ‘nâi, maluâ pôa ai tŭm liăn vâ roê môi toăng rơxế kân, la pôa xuân ối xúa rơxế tu tuh xua gá ai hên tơdroăng dêi môi toăng rơxế kal. Pakĭng tơdroăng ki pơto chơ tơmeăm, rơxế ki kố gá ối chiâng pơchoh klâng chiâk drêng châ krâ tơ’nôm kế tơmeăm ki pin vâ pêi.

Pôa Y Thơm xuân hlo rơxế tu tuh túa ki nếo kố gá tơniăn, mê hdrối vâ roê rơxế nếo, pôa hiăng hmâng rơkong hnê tối dêi khu kŏng an cheăm, ‘no liăn lối tơdế kơxô̆ liăn vâ ăm rơxế tơniăn tâ:

“Drêng pro rơxế ki kố mê kŏng an hiăng tối tâi, athế krâ tơ’nôm pul on xi nhal, peăng hơ-’vá, peăng hơ-ếo. Tâi tâng liăn ‘no pro tâi 125 rơtuh. La rơxế ki kố ôh tá kal tơvêh kế ki quay, kố cho kơmăi đề”.

Ki khât a cheăm Čư̆ Êbur, kong pơlê Dak Lak xuân môi tiah a lâp lu mâu kong pơlê ki ê a Tây Nguyên, iâ rơxế tu tuh ai tŭm mâu pul on, kěng, xi nhal. Tung kơxô̆ lối hrĭng rơpâu toăng rơxế túa ki kố, kơlo kơxô̆ iâ rơxế châ kơto chơ tơmeăm, hmâ chơ to kế tơmeăm pêi lo ing chiâk deăng, pơkeăng, phon rơvât xúa tung pêi chiâk deăng, mâu hmốu, prêi, xơmong xúa tơdroăng ki vâ mơjiâng pro hngêi, kơnâng ƀă hên ki ê châ ngế ki pơkuâ rơxế hmiên tuăn mâu tơdroăng pơkâ tơniăn.

Peăng ki u ối chu kơto chơ tơmeăm tiô rơnó, pul on, kěng ki hên hiăng tơklêh, ngăn ôh tá tơniăn, hơnăm ki lâi xuân ai rôh rơxế tơklô̆m, lơ kơduôp tơdjâk troh rơxế tu tuh trâm a kong xê măng, drêng rơxế ki kố pin ngăn ôh tá xâu hlo. Vâ kơdroh tơdroăng ki xía vâ, ing apoăng hơnăm 2024, kăn sat gâk troăng prôk ƀă kŏng an cheăm a 2 to kong pơlê Dak Lak, Dak Nông, hiăng tơkŭm po hên rôh klâ decal séa ăm rơxế prôk a kong pơlê, tơ’mot hên ngế ki pơkuâ rơxế hâk vâ.

Tiô Đăi tă Bùi Mạnh Tuấn, kăn phŏ pơkuâ Kŏng an cheăm Čư̆ Êbur, pơlê kong kơdrâm Ƀuôn Ma Thuột, kong pơlê Dak Lak, krâ decal séa ngăn bâ ôh ti xê to troăng hơlâ kih thuât mê ối cho troăng hơlâ hnê tối tŭm têk ‘na rak tơniăn troăng prôk ƀă rơxế tu tuh:

"Tơdroăng ki krâ decal kố cho môi túa vâ trâm mâ ƀă kuăn pơlê. Ing tơdroăng ki krâ decal kố vâ hnê tối, mơhnhôk, krếo thế vâi krâ nhŏng o hbrâ krâ xêh pul on séa ăm trâ tung pơla kơto rơxế châ tơniăn tâ. Tơdroăng kố kô châ pro tiô tơdroăng, tơkŭm po đi đo, kơdroh iâ tơdroăng ki ôh tá mơhúa tung xía vâ a troăng prôk”.

A 5 to kong pơlê kơpong Tây Nguyên nôkố ai dâng 200 rơpâu toăng rơxế tu tuh. Tơdroăng ki krâ decal pro ăm trâ ăm mâu rơxế ki kố nếo châ pro ing hơnăm 2019, a mâu cheăm. Troh apoăng hơnăm kố, troăng pơkâ kố nếo châ tơbleăng tung lâp lu, tơrŭm ƀă hnoăng cheăng hnê tối ‘na mâu pơkâ, drêng kơto rơxế a troăng, malối cho tơdroăng ki ôh tá kơto têi luâ pơkâ, pôi tá chơ mơngế tung kơthung rơxế; pêi pro ví rơxế ki ê, tơkâ luâ, pơhlêh troăng troăng tro tơdroăng ƀă hên ki ê.

Thươ̆ng tă Phạm Quốc Lập - Ngế pơkuâ Ƀơrô Kăn sat gâk troăng prôk Kŏng an kong pơlê Dak Nông tối tiah kố, tung tơdroăng ki khât a kong pơlê, kố cho troăng hơlâ ki tơƀrê:

"Krâ decal ăm rơxế tu tuh, rơxế pơchoh chiâk klâng kố vâ ăm mâu ngế ki kơto a troăng hbrâ rơnáu rơxế ‘na ngiâ vâ hbrâ ví, kơdroh xía vâ a troăng. Rơtế a mê cho troăng hơlâ hnê tối mơhnhôk, pơxâu phâk mâu rơxế ki ôh tá tơniăn pơkâ mơni kô trâm tơdroăng xía vâ a troăng prôk”.

Maluâ hiăng tơdjâk tá hâi hên tung tơdroăng mơdêk ki tơniăn dêi rơxế tu tuh drêng kơto a troăng rôh kong hiăng măng, la krâ decal trâ ăm mâu rơxế kố ôh ti xê troăng hơlâ krá ton. Cho rơxế xúa ki xiâm tung pêi chiâk deăng chơ tơmeăm pêi lo, rơxế tu tuh hmâ tro kong mêi, kong tô, tơkâm luâ troăng trâp hliâk, tơkâ luâ mâu troăng êa rơtoh, mâu nhâ loăng tuât, truôh mơni kô rĕng tro tơlêa ƀă pro hía ki pơxúa.

Vâ kơdroh tâ nếo tơdroăng ki xía vâ, rơxế tu tuh a Tây Nguyên kal châ hbrâ mơdât krá tâ nếo mâu pơkâ tro kih thuât tơniăn, ing tíu ki pro, krâ ‘măn.