Thiê̆u tă H’Quý Rơ Chăm pêi cheăng Khu pơtâng tối khôi túa lĕm - Ƀơrô kal kí Khu xiâm pơkuâ lêng kong pơlê Dak Lak. Lối 20 hơnăm rŭm ƀă Khu pơtâng tối khôi túa lĕm, nâ hiăng troh lâp mâu pơlê kơpong pá puât a kong pơlê, ƀă pói vâ djâ rơkong rơhdruê kum ăm kuăn pơlê pơhlêh troăng tơmiât, troăng pêi, mơdêk tơdroăng hlê plĕng ‘na troăng hơlâ luât dêi Đảng, Tơnêi têa.

Pakĭng mê, ƀă hnoăng Kăn xiâm hnê ngăn Khu pơkuâ vâi kơdrâi Khu xiâm pơkuâ lêng kong pơlê Dak Lak, sap hơnăm 2019 troh nôkố, nâ H’Quý Rơ Chăm hiăng pêi pro châ tơƀrê mâu tơdroăng môi tiah ‘’Vâi kơdrâi rơkê tơdroăng cheăng tơnêi têa, rơkê pêi viâ tơdroăng cheăng rơpŏng hngêi’’; ‘’Troăng pêi rơpŏng ngế lêng hơniâp ro’’; tơdah păn roăng 3 ngế muăn kuăn ngế lêng ai tơdroăng rêh ối pá puât; veăng hên tung tơdroăng tŏng kum pơlê pơla... Thiê̆u tă H’Quý Rơ Chăm tối ‘na tơdroăng pêi môi tiah lâi vâi kêi đeăng rơkê tơdroăng cheăng:

‘’Tiô rêm roh, pơtih drêng khu dế ai tơdroăng cheăng kân, mâu tơdroăng pêi cheăng, á thế hbrâ pêi tơ’nôm chôu pơtê, hâi pơtê, vâ tiah lâi tơniăn tơtro pêi pro hnoăng cheăng pơla tơdroăng cheăng ki hmâ pêi ƀă tơdroăng cheăng ki pôu râng tơ’nôm dêi tơná. Drêng vêh ƀă rơpŏng, á mơ-eăm pêi kêi đeăng tâi tâng hnoăng cheăng dêi ngế nôu, ngế kơdrâi tung rơpŏng’’.

Ƀă nâ Trần Thị Hải Yến, Kăn pơkuâ hnê ngăn Đảng ŭy, Cheăng kal kí Khu pơkuâ lêng pơlê kân Quảng Phú, tơring Čư Mgar, tơdroăng pêi cheăng đi đo hriâm tơdroăng ki rơkê plĕng ƀă troăng pêi cheăng hiăng kum nâ 5 hơnăm pơtối châ inâi kăn ƀô̆ hnê kal kí khu rơkê râ kong pơlê a Dak Lak. Hơnăm 2023, nâ veăng Tơ’noăng tâi tâng khu lêng kal kí rơkê xua Khu xiâm pơkuâ gâk kring tơnêi têa tơkŭm po ƀă châ kâ pri ki mơhnhôk. Nâ Trần Thị Hải Yến, tối:

“Hdrối nah, a pêi cheăng a Ƀơrô Hnê arak luât ƀă hiăng pêi pro hên roh pơtâng tối a mâu thôn, pơlê tung tơring ‘na tơdroăng pêi cheăng luât. Drêng pêi cheăng a Khu pêi ‘na luât Hô̆i đong kuăn pơlê tơring, xuân hiăng séa ngăn ‘na kơvâ rah xo lêng hiăng hriăn plĕng nhên mâu mơ-éa a kơvâ kố, xua mê pơhlêh tíu pêi cheăng troh pêi cheăng a đông lêng tung tơdroăng hnê kal kí ăm khu lêng kuăn pơlê ôh tá pá puât. Ƀă tơdroăng pêi pro hnoăng cheăng gâk kring tơnêi têa, mê tơdroăng mơ-eăm dêi châ tơná rế pêi rế hriâm, xuân pơrá kêi đeăng lĕm tro hnoăng cheăng châ pơcháu’’.

Rế rơkê tơdroăng tơnêi têa, tá nâ H’Quý ƀă nâ Hải Yến xuân pơrá rơkê tơdroăng cheăng hngêi, rak vế ki hơtô lĕm rơpŏng hngêi. Ngoh Lê Ngọc Nghĩa, kơnốu nâ Hải Yến, tối ăm ‘nâi, hlê plĕng tơdroăng cheăng dêi kơdrâi, ngoh đi đo hbrâ veăng gum tơdroăng cheăng tung rơpŏng hngêi:

“Drêng kơdrâi ai tơdroăng cheăng ki ôh tá ‘nâi tối hdrối, lơ thế lăm pêi cheăng, mê á kô teăng rak ngăn hnê kuăn ‘nĕng. Mơhnhôk mâu kuăn tiô um méa dêi nôu vâ hnê ăm kuăn ‘nĕng, xua mê cho um méa mơngế khât tơdroăng khât. Ai drêng xuân pro tơdroăng ki nhuô̆m ƀă hâk ăm kuăn ‘nĕng vâ la ngiâ mâu kuăn ai ivá mơ-eăm môi tiah dêi nôu’’.

Tối ‘na mâu khu pú H’Quý Rơ Chăm ƀă Trần Thị Hải Yến, Đăi tă Trần Minh Trọng – Cheăng kal kí Khu xiâm pơkuâ lêng kong pơlê Dak lak tối ăm ‘nâi, kố cho mâu ngế krê ki má môi tung tơdroăng tơ’noăng djâ ƀlêi trâng dêi kong pơlê tung pơla kố nah.

“Mâu khu pú H’Quý Rơ Chăm ƀă Trần Thị Hải Yến châ khât cho mâu ngế ki kơnía tung tơdroăng tơ’noăng dêi khu lêng kong pơlê hneăng hơnăm 2019 – 2024.  Kố châ khât cho mâu ‘’kơpâu reăng lĕm mơnâ mâ ngăn’’ tung kơdrum reăng tơ’noăng dêi khu lêng kong pơlê, kô mơjiâng ivá troh lâp lu ƀă pro tơdroăng ki hâk vâ ăm kăn ƀô̆, mâu lêng, xuân môi tiah mâu ngế vâi kơdrâi tung khu lêng dêi kong pơlê Dak Lak’’.

Đăi tă Trần Minh Trọng tối nhên, pâ vế rơkong hnê dêi Pôa Hồ: ‘’Tơ’noăng pâ nhuô̆m tơnêi têa, hâk vâ tơnêi têa mê thế tơ’noăng. Ngế ki tơ’noăng cho mâu ngế pâ nhuô̆m tơnêi têa má môi’’, mâu hơnăm hiăng hluâ, tơdroăng tơ’noăng khŏm ƀlêi trâng tung khu lêng kong pơlê Dak Lak hiăng troh lâp lu rế hía rế trâu rơdâ. Ing tơdroăng pêi, hiăng ai hên chât ngế krê, khu pú hên ki kơhnâ rơkê má môi, ƀă hên troăng pêi rơkê, troăng pêi nếo, veăng kum mơjiâng khu lêng kong pơlê Dak Lak rế hía rế chĭn quy, ƀeăn ƀĕng, tơxâng mâu pơkâ hnoăng cheăng tung rơxông nếo.