Hneăng hơnăm 2018 – 2024, a Tây Nguyên hiăng ai hên troăng pêi tơdroăng tâi tâng kuăn pơlê gâk kring Tơnêi têa, cho tơdroăng ki eăng tiô troăng pơkuâ xêh, hbrâ mơdât xêh, gâk kring xêh, pro chiâng tơdroăng ki tơdjuôm dêi pơlê pơla, châ pơlê pơla mơngế hdroâng kuăn ngo môi tuăn, thăm veăng pêi. Ki má môi cho mâu troăng ‘’Chiâng vêh tơdroăng ki loi tơngah, rak tơdroăng tơniăn thôn pơlê’’, ‘’Tơdroăng pơkuâ hnê pât mâu ngế Fulro a pơlê pơla” dêi kong pơlê Gia Lai; troăng pêi ‘’Yăo xư̆ tơniăn lĕm – Tơniăn gâk kring pơlê pơla’’, ‘’Tôh pơkuâ xêh ‘na gâk kring tơniăn ƀă hnê pât droh rơtăm xôi luât’’ a kong pơlê Kon Tum; troăng pêi ‘’Kơpong kuăn pơlê tơniăn lĕm ôh tá ai ngế xôi’’, ‘’3 tơniăn gâk kring Chi hô̆i Tin lành Ea Sol’’ a kong pơlê Dak Lak; troăng pêi ‘’5+1 pơkuâ, hnê pât, gum mâu ngế ki hiăng klêi kroăng phâk vêh rêh ối lĕm ƀă pơlê pơla’’, ‘’Yăo xư̆ Nhân Cơ tơniăn ‘na gâk kring’’ a kong pơlê Dak Nông; troăng pêi ‘’Tôh liên ya pơkuâ ‘na gâk kring tơniăn’’, ‘’Kuăn khôp kơpong kuăn pơlê hdroâng kuăn ngo thôn 4, cheăm Tân Châu ƀă tơdroăng tơniăn gâk kring’’ dêi kong pơlê Lâm Đồng...

Ing tơdroăng pêi hiăng ai hên ngế ki rơkê kơhnâ, djâ troăng ahdrối pêi pro lĕm tro troăng pơkâ pêi troăng prôk dêi Đảng, troăng hơlâ luât dêi Tơnêi têa, pơkâ dêi kong pơlê. Hên ngế krê  thăm veăng, tŏng gum mâu khu tung tơdroăng tơniăn gâk kring, pơtâng tối mơhnhôk kuăn pơlê kơchăng hdrối mâu tơdroăng ki tăng pro ‘mêi, tơdroăng pro tơklâ hdroâng kuăn ngo, hbrâ mơdât mâu ngế xôi, mâu ngế ki pro ‘mêi pơlê pơla, hbrâ tơpâ on chếo, gâk kring troăng tơkăng kong, tơneăn tơkăng kong, rak vế kong prâi...

A Hneăng hôp, Khu xiâm pơkuâ Kŏng an hiăng diâp ƀâng kheăn kơdeăn ăm 86 khu pú hên, ngế krê ki kơhnâ rơkê teăng mâ ăm mâu troăng pêi, mâu ngế ki kơhnâ rơkê tung tơdroăng tâi tâng kuăn pơlê gâk kring Tơnêi têa kơpong kuăn pơlê hdroâng kuăn ngo kơpong Tây Nguyên hneăng hơnăm 2018 – 2024. Pôa Y Djan Êban, ối a cheăm Ea Ktur, tơring Čư Kuiñ, kong pơlê Dak Lak cho môi tung mâu ngế ki châ kheăn kơdeăn roh kố, tối:

‘’Á hâk tơngăm châ Khu xiâm pơkuâ Kŏng an krếo trâm mâ tơpui tơno ‘na tơdroăng kuăn pơlê gâk kring Tơnêi têa. Á hâk tơngăm păng ‘nâng. Klêi kơ’nâi hneăng hôp kố, á pơtối vêh a pơlê veăng ƀă kuăn pơlê lăm mơnhông tâ mê nếo ‘na cheăng kâ, khôi túa lĕm tro, rêh ối pơlê pơla, gâk kring tơnêi têa xuân môi tiah pêi cheăng kâ hôm tâ ƀă pơlê’’.

Rơtế ƀă hneăng hôp tơdjuôm tâi tâng kơpong, krê a kong pơlê Dak Lak, Khu xiâm pơkuâ Kŏng an xuân hiăng tơkŭm po Hâi xah hêi ro Tâi tâng kuăn pơlê gâk kring Tơnêi têa tung kơpong kuăn pơlê hdroâng kuăn ngo hơnăm 2024. Tiô tơbleăng, tơdroăng tâi tâng kuăn pơlê gâk kring Tơnêi têa hiăng ai mâu troăng mơnhông ó rơdêi, trâu rơdâ ing kong pơlê troh cheăm, bêng. Hên troăng pêi pơkuâ xêh ‘na gâk kring, gâk kring tơniăn, mâu kâu lăk ƀô̆ hbrâ, mơdât mâu ngế xôi cha tơƀrê.

Xông tơpui a hâi xah hêi ro, Trung tươ̆ng Lê Quốc Hùng, Ngế xiâm phŏ Khu xiâm Kŏng an tối nhên: Dak Lak a Tíu xiâm kơpong Tây Nguyên ai tíu pêi cheăng ki má môi kal khât ‘na gâk kring, kal kí, cheăng kâ, khôi túa lĕm tro – rêh ối pơlê pơla. Xua mê, tơdroăng gâk kring, rak tơniăn pơlê pơla, mơjiâng tơdroăng tơniăn lĕm, gâk kring, gum tung mơnhông cheăng kâ – rêh ối pơlê pơla cho hnoăng cheăng ki kal ƀă khu cheăng kal kí.

Trung tươ̆ng Lê Quốc Hùng pơkâ thế, Dak Lak pơtối mơdêk tơdroăng tâi tâng kuăn pơlê gâk kring Tơnêi têa, gum vâ mơnhông ƀă pơtối pêi hnoăng cheăng, ivá kân kĭn dêi kuăn pơlê:

‘’Kal tơmâng pro krá tơniăn, mơjiâng khu cheăng kal kí a pơlê pơla krá rơdêi tâi tâng. Rêm ngế kăn ƀô̆, đảng viên thế prôk trâu hơngế, achê, păng ‘nâng hlê plĕng tuăn tơmiât, tơdroăng pói vâ dêi Kuăn pơlê, xua pơxúa dêi kuăn pơlê; djâ troăng ahdrối, prôk hdrối tung tơdroăng tâi tâng kuăn pơlê gâk kring Tơnêi têa. Mơdêk tơdroăng pơtâng tối kuăn pơlê ƀă hlối pơtâng tối mơhnhôk, mơdêk hlê plĕng dêi kuăn pơlê. Tơkŭm prôk tung tíu pêi cheăng ki xiâm, kơpong kuăn pơlê hdroâng kuăn ngo, pơhlêh nếo mâu troăng pơtâng tối vâ mơjiâng tơdroăng tâi tâng kuăn pơlê gâk kring Tơnêi têa’’.

A Hâi xah hêi ro, Khu xiâm pơkuâ Kŏng an ƀă Vi ƀan kong pơlê Dak Lak hiăng diâp hên kơxuô tơmeăm ăm mâu rơpŏng mơngế hdroâng kuăn ngo ai tơdroăng rêh ối pá puât tung pơlê kong kơdrâm Ƀuôn Ma Thuột. Roh kố, môi khu pú hên, 1 ngế krê tơdah Ƀâng kheăn kơdeăn dêi Khu xiâm Kŏng an; môi khu pú hên, 3 ngế krê tơdah mơ-éa kheăn kơdeăn dêi Kăn pơkuâ Kŏng an kong pơlê Dak Lak xua ai hnoăng rơkê tung tơdroăng tâi tâng kuăn pơlê gâk kring Tơnêi têa hơnăm 2024.