Ngế ki tro rup mê cho Nguyễn Hữu Ngọc, 45 hơnăm, ối a thôn Đức Đoài, cheăm Đức Minh, tơring Dak Mil, kong pơlê Dak Nông. Hdrối mê, pêi pro túa pơkâ khế pêi cheăng ‘na tơplâ mơdât mâu ngế ki pro xôi, Đông mố đô̆i gak tơkăng kong Dak Lao tơrŭm ƀă mô đô̆i pêi dêi hnoăng cheăng ối tung Khu pơkuâ ngăn Mố đô̆i gak tơkăng kong Dak Nông tơkŭm lăm pơtrui, hbrâ mơdât a kơpong tơneăn tâp hdró tơkăng kong 48/25, cho thôn Đức Kim, cheăm tơkăng kong Dak Lao, tơring Dak Mil.

Akố, khu lêng mô đô̆i gak tơkăng kong hiăng châ rup Ngọc dế vê rơxế tu tuh chơ hên kơthung tung dế ai pơto kế tơmeăm nhôm cho kế ki tro mơdât. Séa ngăn rĕng mâu kơthung, khu mố đô̆i gak tơkăng kong châ hlo lối 400 kg mlŏi reăng kơtoâ tung dế 14 to kơthung caton. Klêi kơ’nâi séa ngăn, Ngọc tối roê mlŏi reăng kố sap ing môi ngế ki tá hâi ‘nâi nhên inâi ƀă tíu ối, dế chơ vêh kơtoâ vâ tê tung rôh Têt la ngiâ.

Tơdroăng kố hiăng châ mố đô̆i gak tơkăng kong dêi Dak Nông chêh pro klêi hồ sơ, pơcháu ngế ƀă mlŏi reăng kố ăm Kŏng an tơring Dak Mil, kong pơlê Dak Nông pơtối séa ngăn, pơxâu phâk tiô pơkâ.