Hneăng hôp cho môi luât tơpui tơno đi đo ƀă nhên khât pơla Chin phuh Việt Nam ƀă khu mơdró vâ ‘mâi hơ’lêh mâu tơdroăng tê mơdró ki kal vâ mơdêk ki mơnhông tơbrê dêi khu mơdró krê kuăn pơlê, tơ’lêi hlâu  tơdroăng ‘no liăn pro tơmeăm khoăng, veăng ‘no hnoăng mơnhông cheăng kâ krâ tơniăn dêi Việt Nam. A rôh hôp, mâu khu mơdró hâk vâ mâu tơdroăng pơ’lêh ‘na mâ ngăn mơnhông tơƀrê Việt Nam ƀă tối tiah kố, tơdroăng  tơbleăng mâu pơkâ môi tiah: Pơkâ kơxô̆ 57 ‘na mơdêk khoa hok, công ngê̆ ƀă pơ’lêh nếo hriê̆n plĕng ki nếo; Pơkâ 59 ‘na hbrâ tơrŭm lâp plâi plâi tơnêi; Pơkâ 68 ‘na mơnhông cheăng kâ krê kuăn pơlê; ƀă Pơkâ 66 ‘na ‘mâi hơ’lêh tơdroăng mơjiâng ƀă pêi pro tro tiô luât... Mâu tơdroăng hnê tối pâ thế Chin phuh pơkâ hnê ƀă troăng hơlâ nhên khât vâ achê ki kơtăn  pơla Tíu xiâm ƀă kong pơlê, tơniăn  môi tuăn  tung rak ngăn tung lâp tơnêi têa.

Tơbleăng a Hneăng hôp, pôa Phạm Minh Chính tối tâi mâu tơdroăng cheăng kâ,  rêh ối dêi Việt Nam ƀă tối nhên: Việt Nam ‘nâi nhên pơkâ mơdêk 8% tung hơnăm 2025 ƀă 2 kơxô̆ tung mâu hơnăm pơtối, tung mê, mơnhông cheăng kâ lĕm krúa, cheăng kâ kơxô̆ kal thế pêi pro, pơkâ pơklât thế, tơtro tiô troăng mơnhông tơƀrê. Chin phuh kô tơkŭm hnê mơhno mâu khu xiâm, kơvâ cheăng, kong pơlê thâ pêi, mơ-eăm, kơdôu mơ-eăm khât vâ kâi tơkâ luâ tŭm tơdroăng xơpá, môi tuăn dêi rơpó, hbrâ hmâ, rơkê ƀeăn, khoa hok, tơƀrê, kơhnâ pơ’lêh nếo, hriê̆n plĕng ki nếo. Ngế pro xiâm hnê ngăn tơnêi têa loi kơ khu mơdró FDI kô pơtối  rơtế ƀă Việt Nam, rơtế ƀă dêi rơpó hriê̆n mơnhông cheăng kâ lĕm krúa, châ tơbriêt tê tơmeăm ƀă krá ton, xua vâ hơniâp kro mơdrŏng tơdjuôm dêi kơpong ƀă lâp plâi tơnêi.