Hiăng tiah hmâ, hmâ a mơ’nui măng tĭng, tôh rak ngăn xêh troăng tơkăng kong ƀă tơneăn tâp hdró Ƀuôn Drăng Phôk, cheăm Krông Na, tơring Ƀuôn Đôn, mê vâi rơtế dêi ƀă mâu kăn ƀô̆, lêng Đông mố đô̆i gâk tơkăng kong Srêpok lăm pơtrui ngăn, séa ngăn kơpong troăng tơkăng kong, tơneăn tâp hdró. Pôa Y Mosk Hra, ngế ki châ kuăn pơlê loi nhuô̆m dêi pơlê ăm ‘nâi, vâi krâ nhŏng o hiăng rêh ối ton a kơpong xiâm dêi Kơdrum kong ilâng Yok Đôn, xua mê, rơtế ƀă tơdroăng ki rak ngăn troăng tơkăng kong, tơneăn tâp hdró, hnoăng cheăng rak ngăn kong kơpong tơkăng kong xuân châ tơtrŏng khât.

Krâ pơlê ngế ki châ kuăn pơlê loi nhuô̆m hmâ djâ mâu hơnăm ối nếo dêi pơlê lăm rơtế ƀă mâu lêng mố đô̆i vâ rak vế tơrêm to xiâm loăng, tơrêm xơtá tơnêi tíu tơkăng kong:

“Tâi tâng kuăn pơlê ngin tơrŭm ƀă Đông mố đô̆i gâk tơkăng kong Srêpok, khu ki pêi dêi hnoăng cheăng a pơlê, cheăm, ‘na kong mê tơrŭm ƀă khu ki rak ngăn loăng pơlái kuăn kiâ kong a kơdrum kong ilâng Yok Đôn vâ rak ngăn rak vế kong ƀă rak vế tơneăn tâp hdró, rak ngăn tơkăng kong. Hnê tối sap ing mâu ngế ki hiăng kân troh vâi hdrêng ki ối kŭn cho athế rak ngăn tơneăn tâp hdró tíu tơkăng kong, mê nếo hnê ăm mâu vâi hdrêng pôi tá tơkâ luâ tíu tơkăng kong vâ lăm ngi kong têa ê”.

A cheăm tơkăng kong Ia Lốp (tơring Ea Súp), 12 to thôn pơrá châ mơjiâng a hơnăm 2006 tiô troăng pơkâ Tơdroăng tơkêa ‘mâi xĕn kuăn pơlê mơnhông mơdêk cheăng kâ nếo dêi Ƀinh doàn 16 – Khu xiâm pơkuâ ngăn lêng mê nôkố cho Khu ngăn tơdroăng cheăng kâ Khu lêng 737, Kuân khu 5. Nâ Hà Thị Phê, a thôn Đừng, cheăm Ia Lốp ăm ‘nâi, troh tíu kố pêi cheăng drêng ối droh, tơkâ luâ 17 hơnăm rêh ối, xo on veăng, nâ xuân môi tiah mâu ngế ki ê hiăng ngăn tíu kố cho pơlê ki má 2 dêi tơná.

Vâi krâ nhŏng o akố pơrá ‘nâi nhên dêi hnoăng cheăng tơná ƀă tơnêi têa. Rak vế troăng tơkăng kong, tơneăn tâp hdró, cho rak vế tơdroăng rêh ối dêi rêm rơpŏng, dêi rêm thôn, pơlê. Rêm ngế kuăn pơlê hiăng ngăn tơná môi tiah tơneăn tâp hdró rêh ối a kơpong tơkăng kong:

“Châ tơdroăng ki hnê tối dêi mâu ngoh mố đô̆i gâk tơkăng ‘na tơdroăng rak vế tíu tơkăng kong tơnêi têa, tơná á rơtế ƀă rơpŏng hngêi hlê tơdroăng kố gá kal khât ƀă kuăn pơlê ngin. Á xuân mơhnhôk rơpŏng hngêi, nhŏng o, kuăn muăn pin đi đo tơrŭm ƀă mâu ngoh mố đô̆i gâk tơkăng kong, khu lêng ƀă kuăn pơlê, kŏng an cheăm veăng tung tơdroăng ki rak vế tíu tơkăng kong”.

Kong pơlê Dak Lak ai lối 71 km troăng tơkăng kong tơkoh ƀă kong têa Kul. Pêi pro tơdroăng pơkâ kơxô̆ 01/CT-TTg, hâi lơ 09/01/2015 dêi Ngế pro xiâm hnê ngăn Chin phuh “ ‘Na tơkŭm po tơdroăng tơ’noăng tâi tâng kuăn pơlê veăng rak vế hnoăng pơkuâ tơnêi tơníu, gâk kring tíu tơkăng kong tơnêi têa tung tơdroăng nếo”, khu kăn pơkuâ mâu cheăm tơkăng kong hiăng tơrŭm ƀă mâu đông mố đô̆i gâk tơkăng kong, mâu khu lêng pêi hnoăng cheăng a tíu tơkăng kong pêi pro tro hnoăng cheăng rak vế gâk kring tơniăn, rak vế hnoăng pơkuâ tơnêi tơníu, gak kring tíu tơkăng kong tơnêi têa.

Hên túa pơkâ ‘na gâk kring tơniăn hiăng châ pơkâ bro ƀă tơkŭm po tro môi tiah: “hơnăm ối nếo ƀă luât”, “idrâp gâk kring”, “kơ’lêng khu lêng ƀă kuăn pơlê”. A 4 to cheăm tơkăng kong ối tung péa tơring Ƀuôn Đôn ƀă Ea Súp nôkố ai lối 2.400 khu pú hên, rơpŏng hngêi, mâu ngế krê chêh inâi veăng rak ngăn xêh vâ chê 60 km troăng tơkăng kong ƀă 4 to tơneăn tâp hdró tíu tơkăng kong.

Trung tă Nguyễn Thanh Tùng, ngế ki pơkuâ Đông mố đô̆i gâk tơkăng kong Ea Hleo, Mố đô̆i gâk tơkăng kong kong pơlê Dak Lak ăm ‘nâi, tơdroăng ki tơrŭm pơla đông ƀă mâu khu tơrŭm cheăng kal kí, mâu hô̆i đoàn a mâu thôn pơlê dế pro pơxúa tơƀrê tung hnoăng cheăng rak vế hnoăng pơkuâ, rak vế gâk kring tíu tơkăng kong tơnêi têa.

“Tíu pêi cheăng hiăng tơrŭm ƀă mâu khu râ pơkuâ cheăng, ai mâu tơdroăng pơkâ ƀă hô̆i vâi kơdrâi, hô̆i ngăn mố đô̆i hơnăm hiăng krâ, veăng rơtế ƀă khu lêng mố đô̆i gâk tơkăng kong vâ lăm pơtrui ngăn, rak vế tơneăn tâp hdró tíu tơkăng kong. Mâu thôn a cheăm pơlê chêh inâi ôh tá ai mâu ngế bro xôi ƀă hbrâ rơnáu rơtế ƀă mố đô̆i gâk tơkăng kong tơplâ mơdâ mâu tơdroăng ki pro xôi drêng mot tung cheăm tơring ing tíu tơkăng kong”.

Đăi tă Đào Viết Hùng, Ngế pơkuâ xiâm Khu pơkuâ ngăn mố đô̆i gâk tơkăng kong kong pơlê Dak Lak ăm ‘nâi, rơtế ƀă “Tơdroăng tơ’noăng tâi tâng kuăn pơlê veăng rak vế hnoăng pơkuâ tơnêi tơníu, gâk kring tíu tơkăng kong tơnêi têa tung tơdroăng nếo”, hnoăng cheăng mơjiâng, ‘mâi mơnhông ki rơkê plĕng tung hnoăng cheăng dêi mâu khu tơrŭm Đảng, Khu kăn pơkuâ ƀă mâu khu pú hên a cheăm tơkăng kong tối tơdjuôm châ ‘mâi mơnhông tâi tâng ƀă rế hía rế pêi cheăng tơƀrê.

Khu kăn ƀô̆, đảng viên gâk tơkăng kong châ pơtroh pêi cheăng a mâu thôn, pơlê, kăn ƀô̆ gâk tơkăng kong lăm pro kăn phŏ pơkuâ ngăn Đảng cheăm dế mơdêk tâi ivá ki kal tung mâu tơdroăng tơ’noăng, mâu tơdroăng tơkêa mơnhông mơdêk cheăng kâ rêh ối pơlê pơla mơhno túa lĕm tro, rak vế tơniăn tơdroăng pơkâ mơnhông mơdêk cheăng kâ tơrŭm ƀă gak kring tíu tơkăng kong:

“Ngin ai túa pơkâ pêi cheăng ƀă khu pơkuâ ngăn Đảng tơring, mâu đông gâk tơkăng kong ‘na tơdroăng pơkâ pêi cheăng ƀă Đảng ủy mâu cheăm vâ pro tơdroăng ki môi tuăn tung Đảng ‘na hnoăng cheăng pơkuâ, hnê mơhno, mê nếo tơdroăng ki môi tuăn tung xúa mâu khu lêng.

Pơtih tung hnoăng cheăng rak ngăn tíu tơkăng kong mê ngin athế tơrŭm tro tiô Pơkâ kơxô̆ 03 dêi Ngế pro xiâm hnê ngăn Chin phuh. Ƀă tơdroăng tơ’noăng tâi tâng kuăn pơlê mê ngin tối nhên rơhêng vâ pêi pro tro ki hdrối tâ athế tơkŭm rơtế ƀă khu pơkuâ Đảng, khu kăn pơkuâ cheăm ‘mâi mơnhông mâu tíu pêi cheăng, malối cho tíu pêi cheăng Đảng. Nôkố a 2 tơring tơkăng kong ai 38 thôn pơlê mê ngin pơrá ai kăn ƀô̆ mố đô̆i gâk tơkăng kong veăng pêi cheăng rơtế ƀă mâu thôn pơlê”.

Rơtế ƀă ivá mơ-eăm ôh tá la lâi pơtê dêi mâu lêng krâ kơlŏng ngiât, tơdroăng ki tơdjuôm ivá dêi kuăn pơlê hiăng veăng kum rak vế krá tơniăn hnoăng pơkuâ tơnêi tơníu, rak vế gâk kring tơniăn a kơpong tíu tơkăng kong dêi kong pơlê Dak Lak